Joel
2 “!Yufala i bloem hon long Saeon!+
Yufala i stap long bigfala hil blong mi we i tabu, yufala i singaot bigwan blong go faet.
!I gud olgeta man we oli stap long kantri ya* oli seksek,
From dei blong Jehova i stap kam!+ !Hem i kam klosap finis!
2 Hem i wan dei we i tudak mo i dak olgeta,+
Wan dei blong ol klaod mo bigfala tudak,+
I olsem laet blong eli moning we i saenaot i go long ol bigfala hil.
I gat ol man we oli plante we plante mo oli strong,+
Neva bifo i gat ol man olsem,
Mo bambae i neva gat ol narawan olsem bakegen
Long olgeta jeneresen we i kam.
3 Long fored blong olgeta, wan faea i flatemgud ol samting,
Mo biaen long olgeta, wan faea i stap kakae ol samting.+
Kantri we i stap long fored blong olgeta, i olsem garen blong Iden,+
Be biaen long olgeta, i gat wan draeples we i emti nomo,
Mo i no gat wan samting i save ronwe.
4 Olgeta oli luk olsem ol hos,
Mo oli ron olsem ol hos blong faet.+
5 Saon blong olgeta i olsem blong ol jariot, taem oli stap ron i go antap long top blong ol bigfala hil,+
Mo olsem noes blong ol stamba blong wit we faea i stap bonem olgeta.
Oli olsem ol strong man we oli laenap rere blong faet.+
6 Mo from olgeta, ol man bambae oli harem nogud tumas.
Fes blong evri man i kam nogud.
7 Oli ron olsem ol strong man blong faet,
Oli klaem i go ova long stonwol olsem ol soldia,
Olgeta wanwan oli wokbaot stret nomo long rod blong olgeta,
Mo oli no gowe long rod blong olgeta.
8 Oli no puspusum olgeta,
Olgeta wanwan oli wokbaot stret folem rod blong olgeta.
Sipos ol tul blong faet* i mekem samfala oli foldaon,
Ol narafala oli no gowe long laen blong olgeta.
9 Oli spid i go long ol taon, oli ron i go antap long ol stonwol.
Oli klaem antap long ol haos, oli gotru long ol windo olsem stilman.
10 Long fored blong olgeta, graon i seksek mo heven i muvmuv strong.
San mo mun i kam tudak,+
Mo ol sta oli no moa saen.
11 Jehova bambae i leftemap voes blong hem long fored blong ol ami blong hem,+ from kamp blong hem i plante we i plante.+
From man ya we i stap mekem tok blong Hem i kamtru, hem i strong,
From dei blong Jehova i bigwan mo i mekem man i sapraes, i fraet.+
?Hu i save stanap strong long dei ya?”+
12 Jehova i talem se: “Naoia i no let yet, yufala i kambak long mi long fulhat blong yufala,+
Yufala i fasting+ mo yufala i krae we yufala i krae bigwan.
13 Yufala i terem hat blong yufala+ be i no ol klos blong yufala,+
Mo yufala i kambak long Jehova, God blong yufala,
From we hem i kaen* mo i gat sore, i no save kros kwik,+ mo fasin blong hem blong lavem man oltaem i bigwan tumas,+
Mo bambae hem i luklukgud bakegen long* bigfala trabol ya.
14 ?Hu i save, maet bambae hem i save jenisim tingting blong hem mo i luklukgud bakegen long* samting ya+
Mo i livim wan blesing i stap,
Yes wan sid ofring mo wan dring ofring blong givim i go long Jehova God blong yufala?
15 “!Yufala i bloem hon long Saeon!
Yufala i talem blong ol man oli fasting,* yufala i singaot ol man oli kam wanples long wan impoten asembli.+
16 Yufala i singaot ol man oli kam wanples, yufala i mekem kongregesen i tabu.+
Yufala i tekem ol olfala man,* yufala i singaot ol pikinini mo ol bebi we oli stap titi yet, oli kam wanples.+
I gud man we i rere blong mared i aot long rum blong hem we i stap insaed olgeta, mo gel we i rere blong mared i aot long rum blong mared.
17 I gud ol pris, hemia ol minista blong Jehova,
Oli stap bitwin rum long doa mo olta,+ oli krae mo oli se:
‘O Jehova, yu sore long ol man blong yu,
Yu no mekem olting we oli blong yu, oli kam olsem wan samting blong laf long hem,
We yu letem ol nesen oli rul antap long olgeta.
From wanem ol man oli mas talem se: “?Wehem God blong olgeta?”’+
18 Biaen Jehova bambae i gat strong tingting blong protektem kantri blong hem
Mo i soemaot se i kaen long ol man blong hem.+
19 Jehova bambae i ansa long ol man blong hem se:
‘Naoia mi mi stap sanem ol sid mo niu waen mo oel i kam long yufala,
Mo bambae yufala i harem gud fulwan long olgeta,+
Bambae mi no moa mekem ol nesen oli tok nogud long yufala.+
20 Bambae mi ronemaot ol man long not, oli go longwe long yufala,
Bambae mi mekem olgeta oli go stap olbaot long wan ples we i drae mo i nogud i stap emti nomo,
Bambae mi ronem ol ami we oli stanap long fored oli* go long solwota long is.*
Mo mi ronemaot ol ami we oli kam biaen oli go long solwota long wes.*
Smel blong olgeta we i nogud bambae i go antap,
Smel blong olgeta we i sting nogud bambae i gohed blong go antap,+
From bambae Hem i mekem ol bigbigfala samting.’
21 O graon, yu no fraet.
I gud yu glad mo yu harem gud, from Jehova bambae i mekem ol bigbigfala samting.
22 Yufala ol wael animol blong open ples, yufala i no fraet,
From ol gras long draeples bambae oli kam grin,+
Mo ol tri bambae oli karem frut,+
Ol figtri mo ol rop blong grep bambae oli givim plante plante kakae.+
23 Yufala ol boe blong Saeon, yufala i glad mo harem gud from Jehova, God blong yufala,+
From hem bambae i givim ren long taem we ol lif oli stap folfoldaon, stret olsem we graon ya i nidim,
Mo bambae hem i sanem bigfala ren i kam long yufala,
Hemia ren long taem we ol lif oli stap folfoldaon mo ren long taem we ol samting oli gru, olsem bifo.+
24 Ples blong klinim wit bambae i fulap long ol sid we oli klin,
Mo ples blong mekem waen bambae i fulap long niu waen mo oel gogo i kafkafsaed.+
25 Mo bambae mi pembak olgeta samting we oli lus long ol yia ya
We bigfala grup blong ol lokis, ol lokis we oli no gat wing, ol lokis we oli stap kakae bigwan, mo ol lokis we oli stap kakae evri samting, oli kakae olgeta,
Hemia bigfala ami blong mi we mi sanem olgeta i kam long yufala.+
26 Bambae yufala i kakae gogo yufala i fulap gud,+
Mo bambae yufala i presem nem blong Jehova God blong yufala,+
We i mekem ol samting blong sapraes long bihaf blong yufala,
Mo ol man bambae oli neva mekem ol man blong mi oli sem bakegen.+
27 !Mo bambae yufala i save se mi mi stap long medel blong Isrel+
Mo se mi mi Jehova, God blong yufala,+ i no gat wan narawan!
Mo ol man bambae oli neva mekem ol man blong mi oli sem bakegen.
28 Afta long samting ya, bambae mi kafsaedem spirit blong mi+ long enikaen man,
Nao ol boe mo ol gel blong yufala bambae oli talemaot ol profet tok,
Ol olfala man blong yufala bambae oli drim long ol drim,
Mo ol yang man blong yufala bambae oli luk ol vison.+
29 Mo nating we ol woman mo ol man blong mi oli slef nomo,
Be long ol dei ya, bambae mi kafsaedem spirit blong mi long olgeta.
30 Mo bambae mi mekem ol samting blong sapraes long heven mo long wol,
Bambae i gat blad mo faea mo bigfala smok.+