Fas leta i go long Korin

7 Blong ansa long ol kwestin we yufala i raetem i kam, i moa gud we man i no tajem woman,* 2 be from we plante man oli stap mekem enikaen doti fasin blong seks,* i gud ol man wanwan oli gat prapa waef blong olgeta,+ mo ol woman wanwan oli gat prapa hasban blong olgeta.+ 3 I gud hasban i givim samting we waef blong hem i nidim,* mo i gud waef tu i mekem sem mak long hasban blong hem.+ 4 Waef i no bos long prapa bodi blong hem, be hasban blong hem nao i bos long hem. Long sem fasin, hasban i no bos long prapa bodi blong hem, be waef blong hem nao i bos long hem. 5 Yutufala i no mas blokem bodi blong yutufala long yutufala. Sipos yutufala i agri blong livim seks blong smoltaem blong yutufala i save gat taem blong prea, hemia i gud. Be biaen yutufala i mas gohed long fasin ya bakegen, blong Setan i no save gohed blong traem yutufala, from we yutufala i no naf blong bos long tingting blong yutufala. 6 Yufala i save folem tok blong mi, be hemia i no wan loa. 7 Be mi wantem se olgeta man oli stap olsem mi. Be olgeta man wanwan oli gat prapa presen blong olgeta+ we God i givim long olgeta, samfala oli gat presen olsem mo sam narafala oli gat defren wan.

8 Naoia mi talem long olgeta we oli no mared mo ol wido se i moa gud oli stap olsem mi nomo.+ 9 Be sipos oli no naf blong bos long tingting blong olgeta, i moa gud oli mared, from we i moa gud man i mared i bitim we hem i wantem woman tumas.+

10 Advaes we mi mi givim long olgeta we oli mared, i no kamaot long mi be i kamaot long Masta, advaes ya se waef i no mas seraot long hasban blong hem.+ 11 Be sipos hem i seraot long hasban blong hem, i gud hem i stap olsem nomo, i no mared. Sipos no, hem i mas kambak bakegen long hasban blong hem. Mo hasban i no mas lego waef blong hem.+

12 Long ol narafala, tok we mi wantem talem, i no blong Masta, i blong mi nomo.+ Mi wantem talem se: Sipos waef blong wan brata i no bilif, be hem i glad nomo blong stap wetem brata ya, i gud brata ya i no lego hem. 13 Mo sipos wan hasban i no bilif, be hem i glad nomo blong stap wetem waef blong hem, i gud waef ya i no lego hem, 14 from we hasban we i no bilif i joen long waef ya, nao mared blong hem i tabu. Mo waef we i no bilif i joen long brata ya, nao mared blong hem i tabu. Sipos i no olsem, ol pikinini blong yufala bambae oli no klin, be naoia oli tabu. 15 Be sipos hasban o waef we i no bilif i jusum blong aot,* letem hem i go. Taem samting olsem i hapen, i no moa gat wan samting i fasem brata o sista long hemia we i aot, from we God i singaot yufala blong yufala i stap long pis.+ 16 Waef, sipos yu stap wetem hasban blong yu, maet yu save sevem hem.+ Mo hasban, sipos yu stap wetem waef blong yu, maet yu save sevem hem.

17 I gud yumi wanwan i wokbaot folem samting we Jehova* i givim long yumi, hemia ol samting we yumi gat finis taem hem i singaot yumi.+ Taswe mi givim advaes ya long olgeta kongregesen. 18 ?I gat wan long yufala we hem i sakomsaes finis taem God i singaot hem?+ I gud hem i stap olsem. ?Mo i gat wan long yufala we i no sakomsaes taem God i singaot hem? I gud hem i no sakomsaes.+ 19 Fasin ya blong sakomsaes mo blong no sakomsaes, tufala i nating nomo.+ Samting we i impoten hemia blong man i obei long ol komanmen blong God.+ 20 Nomata se yumi olsem wanem taem God i singaot yumi, i gud yumi stap olsem nomo.+ 21 ?Yu yu wan slef taem God i singaot yu? Sipos yes, yu no wari long samting ya,+ be sipos yu save kam fri, i gud yu tekem janis ya, 22 from we sipos God i singaot wan man blong Masta taem hem i wan slef yet, man ya i kam friman, hem i blong Masta.+ Long sem fasin, sipos God i singaot wan man taem hem i friman, man ya i kam slef blong Kraes. 23 God i pemaot yufala finis long wan praes.+ Taswe yufala i stop blong kam slef blong ol man. 24 Ol brata, nomata se yumi olsem wanem taem God i singaot yumi, i gud we long fes blong God, yumi stap olsem nomo.

25 Long olgeta we oli no mared,* mi mi no gat tok blong Masta blong talem, mi save talem tingting blong mi nomo,+ be yufala i save trastem tok blong mi from we Masta i sore long mi. 26 From we naoia laef i had, mi ting se i moa gud ol man oli stap olsem we oli stap. 27 ?Yu yu gat wan waef? Yu stop blong lukaot rod blong lego hem.+ ?Yu yu no gat waef? Yu stop blong lukaot wan waef. 28 Be sipos yu mared, yu no mekem sin. Mo sipos olgeta we oli no mared,* oli mared, oli no mekem sin. Be olgeta we oli mared, bambae oli kasem trabol long bodi blong olgeta. Mo mi mi stap traem givhan long yufala nomo blong yufala i no kasem trabol.

29 Nao mi mi talem samting ya long yufala ol brata, se taem we i stap yet i sot tumas.+ Taswe stat naoia i go, i gud olgeta we oli gat waef, oli stap olsem we oli no gat, 30 mo olgeta we oli krae, oli stap olsem olgeta we oli no krae, mo olgeta we oli glad, oli stap olsem olgeta we oli no glad, mo olgeta we oli pem samting, oli stap olsem olgeta we oli no gat samting, 31 mo olgeta we oli stap yusum wol, oli stap olsem olgeta we oli no yusum wol fulwan, from we ol samting we oli stap hapen long wol ya oli stap jenis. 32 Mi mi wantem se yufala i no mas wari. Man we i no mared, hem i stap wari long ol samting blong Masta, se olsem wanem hem i save mekem Masta i glad long hem. 33 Be man we i mared, hem i stap wari long ol samting blong wol ya,+ se olsem wanem hem i save mekem waef blong hem i glad long hem, 34 mo tingting blong hem i stap long tu samting. Mo tu, woman we i no mared, mo gel we i no save man yet, hem i wari long ol samting blong Masta,+ blong hem i save stap tabu long bodi mo long tingting blong hem. Be woman we i mared, hem i wari long ol samting blong wol, se olsem wanem hem i save mekem hasban blong hem i glad long hem. 35 Mi mi talem ol tok ya blong givhan long yufala, be i no blong blokem* yufala. Mi mi talem tok ya blong pulum yufala blong mekem samting we i stret, mo blong yufala i mekem wok blong Masta we i no gat samting i pulum tingting blong yufala.

36 Be sipos wan man we i no mared,* i ting se hem i no save bos long filing blong hem, mo sipos hem i pastru long yang taem blong hem finis, hem i mas mekem olsemia: I gud hem i mekem samting we hem i wantem, hem i no mekem sin ya. I gud ol man olsem oli mared.+ 37 Be sipos wan man i jusum long hat blong hem se bambae hem i no mared, mo hem i holemstrong long desisen ya from we hem i ting se i no nid blong hem i mared, mo hem i naf blong bos long ol filing blong hem, bambae hem i harem gud.+ 38 Taswe man we i mared, hem i mekem i gud, be man we i no mared, hem i mekem i gud moa.+

39 Loa i fasem waef long hasban blong hem taem hem i laef yet.+ Be sipos hasban blong hem i slip long ded, waef ya i fri blong mared long eni man we hem i wantem, be nomo se man ya i mas wan man blong Masta.+ 40 Be long tingting blong mi, sipos hem i stap olsem nomo, bambae hem i glad moa. Mo mi mi ting se spirit blong God i stap long mi tu.