Jajes
13 Nao ol laen blong Isrel oli mekem samting we i nogud bakegen long ae blong Jehova,+ nao Jehova i letem olgeta oli go long han blong ol man Filistia+ blong 40 yia.
2 Long taem ya, i gat wan man Joraha+ we i famle blong laen blong Dan,+ nem blong hem Manoa.+ Waef blong hem i no save gat bel mo hem i no gat pikinini.+ 3 Samtaem i pas, enjel blong Jehova i kamtru long waef blong Manoa, mo i talem long hem se: “Yu luk, yu yu no save gat bel mo yu no gat pikinini. Be bambae yu gat bel mo bambae yu bonem wan boe.+ 4 Naoia yu mas lukaot gud blong yu no dring waen, o eni dring we i gat alkol long hem,+ mo yu no kakae ol kakae we oli no klin long fes blong God.+ 5 !Yu luk! Bambae yu gat bel, mo bambae yu bonem wan boe. Be yu no mas pulum resa long hed blong hem,+ from we pikinini ya bambae i wan Nasiraet blong God, stat long taem we hem i bon. Mo hem nao bambae i statem wok ya blong sevem ol man Isrel, i tekemaot olgeta long han blong ol man Filistia.”+
6 Nao woman ya i go talem long hasban blong hem se: “Wan man blong tru God i kamtru long mi, mo hem i luk olsem wan enjel blong tru God, mo i mekem mi mi sapraes be mi fraet tu. Mi mi no askem long hem se hem i kam wea, mo hem i no talem nem blong hem tu long mi.+ 7 Be hem i talem long mi se: ‘!Yu luk! Bambae yu gat bel mo bambae yu bonem wan boe. Naoia yu no mas dring waen, no wan narafala strong dring, mo yu no kakae ol kakae we oli no klin long fes blong God, from we pikinini ya bambae i wan Nasiraet blong God, stat long taem we hem i bon gogo kasem dei we hem i ded.’”
8 Nao Manoa i plis long Jehova mo i se: “Sore Jehova. Plis yu letem man ya blong tru God we yu sanem hem i kam lastaem, i kambak bakegen, blong i tijim mitufala long ol samting we mitufala i mas mekem long pikinini ya we bambae i bon.” 9 Ale tru God i lesin long Manoa, nao enjel blong tru God i kamtru long woman ya bakegen, taem hem i stap sidaon long wan open ples aotsaed. Long taem ya, hasban blong hem i no stap wetem hem. 10 Ale woman ya i resis kwiktaem i go luk hasban blong hem, i talem long hem se: “!Yu luk! Man ya we i kamtru long mi lastaem, hem i kamtru long mi bakegen.”+
11 Nao Manoa i girap i folem waef blong hem. Hem i go luk man ya mo i talem long hem se: “?Yu nao yu bin toktok wetem waef blong mi?” Ale man ya i talem se: “Yes mi ya.” 12 Nao Manoa i talem se: “!I gud toktok blong yu i kamtru! ?Be laef blong boe ya bambae i olsem wanem, mo wanem wok blong hem?”+ 13 Nao enjel blong Jehova i talem long Manoa se: “Waef blong yu i no mas kakae mo dring ol samting ya we mi talem long hem.+ 14 Hem i no mas kakae eni samting we oli wokem long frut blong grep, mo hem i no mas dring waen o eni dring we i gat alkol long hem,+ mo hem i no mas kakae ol kakae ya we oli no klin long fes blong God.+ Hem i mas folem gud evri samting we mi talem long hem.”
15 Ale Manoa i talem long enjel blong Jehova se: “Plis yu no go fastaem, i gud mitufala i kukum wan yang nani blong yu kakae.”+ 16 Be enjel blong Jehova i talem long Manoa se: “Sipos mi stap, bambae mi no kakae kakae ya we bambae yu givim. Be sipos yu wantem givim wan ofring we i bon fulwan i go long Jehova, yu save mekem.” Manoa i no save se man ya i wan enjel blong Jehova. 17 Nao Manoa i askem long enjel blong Jehova se: “?Wanem nem blong yu?+ I gud yu talemaot, olsem nao mitufala i save ona long yu taem tok blong yu i kamtru.” 18 Be enjel blong Jehova i talem long hem se: “?From wanem yu askem nem blong mi? Nem blong mi i spesel tumas.”
19 Ale Manoa i tekem yang nani ya wetem ol sid ofring mo i bonem olgeta antap long wan bigfala ston, i go long Jehova. Mo taem Manoa wetem waef blong hem tufala i stap lukluk hem, Hem* i mekem wan samting we tufala i sapraes tumas long hem. 20 Taem laet blong faea ya we i stap long olta i laet i go antap, Manoa mo waef blong hem i luk we enjel blong Jehova i stap insaed long laet blong faea ya, mo i go antap long skae. Nao wantaem nomo tufala i foldaon we fes blong tufala i kasem graon. 21 Ale enjel blong Jehova i no moa kamtru bakegen long Manoa wetem waef blong hem. Nao Manoa i kasem save se man ya i wan enjel blong Jehova.+ 22 Ale Manoa i talem long waef blong hem se: “Tru, bambae yumitu ded ya from we yumitu luk God.”+ 23 Be waef blong hem i talem long hem se: “Sipos Jehova i wantem kilim yumitu i ded, bambae hem i no save akseptem ofring ya we i bon fulwan,+ wetem ol sid ofring ya long han blong yumitu. Mo bambae hem i no soemaot ol samting ya long yumitu, mo bambae hem i no save talem ol samting ya tu long yumitu.”
24 Biaen woman ya i bonem wan boe, mo i putum nem blong hem se Samson.+ Taem boe ya i stap gruap, Jehova i gohed blong blesem hem. 25 Samtaem i pas, taem hem i stap long Mahanedan,+ wan ples we i stap bitwin Joraha mo Estaol,+ spirit blong Jehova i stat blong wok long hem.+