Jeremaea
1 Hemia ol tok blong Jeremaea* boe blong Hilkia we i wan long ol pris long Anatot+ long graon blong Benjamin. 2 Tok blong Jehova i kamtru long hem long ol dei blong Josaea+ we i boe blong Amon,+ king blong Juda, long namba 13 yia we hem i rul. 3 Mo tu, tok ya i kamtru long ol dei blong Jehoeakim+ we i boe blong Josaea, king blong Juda, go kasem en blong namba 11 yia blong Jedekia+ we i boe blong Josaea, king blong Juda, gogo kasem we Jerusalem i go long narafala kantri long namba 5 manis.+
4 Tok blong Jehova i kamtru long mi, se:
5 “Bifo we mi wokem yu long bel blong mama blong yu, mi mi save* yu finis,+
Bifo we yu bon,* mi mi mekem yu yu tabu finis,*+
Mi mekem yu yu kam wan profet blong ol nesen.”
6 Be mi talem: “!O no! Hae Masta Jehova,
Mi mi no save olsem wanem blong toktok,+ from we mi mi wan yang boe nomo.”*+
7 Nao Jehova i talem long mi se:
“Yu no mas talem se: ‘Mi mi wan yang boe nomo.’
From we yu mas go long olgeta we bambae mi sanem yu yu go long olgeta,
Mo yu mas talemaot evri samting we mi talem long yu.+
8 Yu no mas fraet from fes mo bodi blong olgeta,+
From we Jehova i talem se: ‘Mi mi stap wetem yu blong sevem yu.’”+
9 Nao Jehova i pusum han blong hem i kam, i tajem maot blong mi.+ Mo Jehova i talem long mi se: “Mi mi putum ol tok blong mi long maot blong yu.+ 10 Yu luk, tede mi givim wan wok long yu antap long ol nesen mo antap long ol kingdom, blong yu pulumaot mo yu pulumdaon, blong yu spolem mo yu brekemdaon, blong yu bildim mo yu planem.”+
11 Tok blong Jehova i kamtru bakegen long mi, se: “Jeremaea, ?yu luk wanem?” Nao mi talem se: “Mi luk branj blong wan tri ya almon.”*
12 Jehova i talem long mi se: “Samting we yu luk i stret, from we mi mi wekap gud from tok blong mi, blong mekem i kamtru.”
13 Tok blong Jehova i kamtru long mi seken taem, se: “?Yu luk wanem?” Nao mi se: “Mi luk wan sospen* i stap boel,* mo maot blong hem i lei i gowe long not.” 14 Nao Jehova i talem long mi se:
“Bigfala trabol bambae i brokaot long not i kam
Agensem olgeta man we oli stap long graon ya.+
15 From we Jehova i talem se: ‘Naoia mi stap singaotem olgeta famle blong ol kingdom long not,+
Mo bambae oli kam, mo wanwan long olgeta bambae i putumap tron* blong hem
Long fran blong ol get blong Jerusalem,+
Mo agensem ol stonwol blong hem long evri saed.
Mo agensem olgeta taon blong Juda.+
16 Mo bambae mi talemaot jajmen blong mi agensem olgeta from ol nogud fasin blong olgeta,
From we oli lego mi finis,+
Mo oli stap bonem sakrefaes blong mekem i smok i go long ol narafala god+
Mo oli stap bodaon long ol wok we han blong olgeta nomo i mekem.’+
17 Be yu yu mas rere blong tekem aksen,*
Mo yu mas stanap mo yu talemaot long olgeta, evri samting we mi talem long yu.
Yu no mas fraet long olgeta,+
Olsem nao mi no save mekem se yu fraet long fored blong olgeta.