Jajes
12 Nao ol laen blong Efrem oli kam wanples mo oli gokros, oli go long Jafon,* oli talem long Jeftaha se: “?From wanem yu no singaot mifala i kam wetem yu, taem yu go narasaed blong faet agensem ol man Amon?+ Bambae mifala i bonem yu wetem haos blong yu.” 2 Be Jeftaha i talem long olgeta se: “Mi wetem ol man blong mi, mifala i mekem wan bigfala faet wetem ol man Amon. Long taem ya, mi singaot yufala blong yufala i kam halpem mi, be yufala i no kam tekemaot mi long han blong olgeta. 3 Taem mi luk se yufala i no wantem kam sevem mi, mi girap, mi putum laef* blong mi long denja, nao mi go faet agensem ol man Amon.+ Ale Jehova i putum olgeta long han blong mi. ?Nao from wanem yufala i kam tede blong faet agensem mi?”
4 Nao Jeftaha i tekem olgeta man Gilead oli kam wanples,+ mo oli go faet agensem ol laen blong Efrem. Ale ol man Gilead oli winim ol laen blong Efrem we oli bin talem se: “Yufala ol man Gilead, bifo yufala i stap long graon blong ol laen blong Efrem mo Manase, be biaen yufala i ronwe.” 5 Ol man Gilead oli go long Jodan Reva+ fastaem long ol laen blong Efrem, nao oli blokem ol ples we ol man oli stap folem blong krosem reva ya. Ale taem ol laen blong Efrem oli traem blong ronwe, nao oli kam askem long ol man Gilead se: “Yu letem mi mi gokros.” Be ol man Gilead bambae oli askem long ol man ya wanwan se: “?Yu yu laen blong Efrem?” Sipos hem i talem se: “!No!” 6 Ale oli talem long hem se: “Plis, yu traem talem tok ya Jibolet.” Be bambae hem i talem se: “Sibolet,” from we hem i no naf blong talem gud tok ya. Ale bambae oli holem hem mo oli kilim hem long ples ya. Long taem ya, 42,000 man long laen blong Efrem oli ded.
7 Jeftaha, man Gilead ya, hem i jaj blong ol man Isrel blong sikis yia, biaen hem i ded, mo oli berem hem long taon blong hem long Gilead.
8 Afta long Jeftaha, Ibsan we i blong Betlehem, i kam jaj blong ol man Isrel.+ 9 Hem i gat 30 boe mo 30 gel. Hem i sanem ol gel blong hem blong oli go mared long ol man blong narafala famle long laen blong hem, mo hem i tekem 30 woman oli kam blong oli mared long ol boe blong hem. Hem i jaj blong ol man Isrel blong seven yia. 10 Biaen Ibsan i ded, mo oli berem hem long Betlehem.
11 Afta long hem, Elon we i laen blong Sebulun i kam jaj blong ol man Isrel. Mo hem i jaj blong olgeta blong ten yia. 12 Biaen Elon ya we i laen blong Sebulun i ded, mo oli berem hem long Aealon long graon blong Sebulun.
13 Afta long hem, Abdon boe blong Hilel we i man Piraton, i kam jaj blong ol man Isrel. 14 Hem i gat 40 boe mo 30 smol bubu boe we oli stap raed long 70 dongki. Hem i jaj blong ol man Isrel blong eit yia. 15 Biaen Abdon boe blong Hilel we i man Piraton i ded, mo oli berem hem long Piraton long graon blong Efrem, long bigfala hil blong ol man Amalek.+