Job

 2 “Hemia nao from wanem tingting blong mi we i trabol tumas i pulum mi blong ansa

From we mi mi harem nogud tumas.

 3 Mi harem wan strong tok we narafala i talem, we i spolem mi.

Mo fasin blong mi blong kasemsave* i pulum mi blong ansa.

 4 I sua se yu yu save samting ya longtaem finis,

From we i stap finis stat long taem we God i putum man* long wol,+

 5 Hemia se ol man nogud, glad blong olgeta i stap sot taem nomo

Mo ol man we oli no bilif long God,* oli harem gud blong smoltaem nomo.+

 6 Nating se haenem blong hem i go antap kasem heven

Mo hed blong hem i kasem ol klaod,

 7 Bambae hem i lus olwe olsem sitsit blong animol blong hem.

Olgeta we oli stap luk hem oltaem, bambae oli se: ‘?Wehem hem?’

 8 Bambae hem i flae i go olsem wan drim, mo bambae oli no faenem hem.

Bambae oli ronem hem i gowe olsem wan vison we man i luk long naet.

 9 Ae we i bin luk hem, bambae i no luk hem bakegen,

Mo ples blong hem bambae i no moa luk hem.+

10 Ol stret pikinini blong hem bambae oli traehad blong ol puaman oli kaen long olgeta,

Mo han blong hem nomo bambae i givimbak ol sas samting blong hem.+

11 Ol bun blong hem oli fulap gud long paoa blong yangtaem,

Be bambae i* godaon wetem hem long das.

12 Sipos long maot blong hem, hem i testem wan nogud samting se i swit,

Sipos hem i haedem samting ya aninit long tang blong hem,

13 Sipos hem i stap harem gud long tes blong hem mo i no lego

Be i gohed blong holem insaed long maot blong hem,

14 Bambae kakae blong hem i jenis i kam konkon insaed long bel blong hem,

Bambae i kam olsem posen* blong ol kobra snek insaed long bodi blong hem.

15 Hem i bin solemdaon ol sas samting, be bambae hem i traot long olgeta,

God bambae i karemaot olgeta long bel blong hem.

16 Bambae hem i dring posen blong ol kobra snek,

Mo ol tut* blong wan posen snek bambae i kilim hem.

17 Bambae hem i neva luk wota we i stap ron,

Hemia hani mo bata we oli stap ron bigwan olsem reva.

18 Bambae hem i givimbak olting blong hem we hem i no gat janis blong kakae,*

Bambae hem i no harem gud long ol sas samting we i kasem long bisnes blong hem,+

19 From hem i smasem ol puaman mo i lego olgeta finis.

Hem i tekemaot wan haos we hem i no wokem i blong hem.

20 Be insaed long hem, bambae hem i no harem se hem i gat pis.

Ol sas samting blong hem bambae oli no halpem hem blong ronwe.

21 Bambae i no gat samting i stap blong hem i kakae.

Taswe olting blong hem bambae oli no stap longtaem.

22 Taem ol sas samting blong hem oli kasem mak blong hem, bambae hem i wari bitim mak.

Evri nogud samting bambae oli kam agensem hem.

23 Taem hem i stap fulumap bel blong hem,

God* bambae i sanem kros blong hem we i olsem faea i kam long hem,

Olsem we ren i folfoldaon long hem, i go insaed long gat blong hem.

24 Taem hem i ronwe long tul blong faet we oli wokem long aean,

Ol ara long wan bonara we oli wokem long kopa, bambae oli sperem hem.

25 Hem i pulumaot wan ara long baksaed blong hem,

Wan saen ara long galblada* blong hem,

Mo fraet i kilim nogud hem.+

26 Bigfala tudak i stap wet long ol gudfala samting blong hem.

Faea we man i no fanem, bambae i kakae hem.

Bigfala trabol i stap wet long eni man we i laef yet long tent blong hem.

27 Heven bambae i soemaot ol rong blong hem.

Mo wol bambae i girap agensem hem.

28 Bigfala wota bambae i wasemaot haos blong hem,

Bambae i kam wan wota we i ron strong long dei blong kros blong God.*

29 Hemia nao samting we man nogud i kasem long God,

Samting we God i putumgud finis i stap se i blong hem.”