Fas Samuel
29 Nao ol man Filistia+ oli tekem evri soldia blong olgeta i kam wanples long Afek. Long taem ya ol man Isrel oli stap long kamp blong olgeta klosap long springwota long Jisrehel.+ 2 Ol rula blong Filistia oli maj i kam wetem ol soldia blong olgeta we oli seraot i go long ol grup, sam grup i gat handred soldia, mo sam grup i gat taosen soldia. Mo biaen long olgeta, i gat Deved wetem ol man blong hem mo Akis.+ 3 Be ol prins blong Filistia oli talem se: “?Ol man Hibru ya oli mekem wanem long ples ya?” Nao Akis i talem long ol prins ya se: “Hemia Deved ya, man blong wok blong King Sol blong Isrel, hem i stap wetem mi wan yia finis no ating i bitim wan yia.+ Mi mi no faenem wan samting nating we hem i mekem i rong, stat long dei we hem i ronwe i kam stap wetem mi kam kasem tede.” 4 Be ol prins blong Filistia oli kros long hem mo oli talem se: “Yu sanem man ya i gobak long ples we yu givim long hem.+ Yu no letem hem i godaon wetem yumi blong faet, i nogud hem i tanemraon nao i agensem yumi.+ Sipos hem i givim hed blong ol man blong yumi long masta blong hem, bambae masta blong hem i glad tumas. 5 Deved ya nao we ol woman oli stap danis mo oli stap singsing from hem se:
‘Sol i kilim taosen man oli ded,
Mo Deved i kilim plante taosen moa.’”+
6 Ale Akis+ i singaot Deved mo i talem se: “Mi mi talem long yu long nem blong Jehova we i laef i stap, se yu yu wan stret man, mo mi glad se yu joenem mi wetem ami blong mi blong go long faet ya.+ Hemia from we mi mi no faenem wan samting nating we yu mekem i rong, stat long dei we yu kam stap wetem mi kam kasem tede.+ Be ol rula ya oli no trastem yu.+ 7 Taswe i gud yu gobak long pis, mo yu no mekem eni samting we bambae i mekem ol rula blong Filistia oli no glad.” 8 Be Deved i askem long Akis se: “?From wanem? ?Mi mi mekem wanem? ?Wanem nogud samting we mi mekem long yu stat long dei we mi kam stap wetem yu kam kasem tede? ?Masta mo king blong mi, from wanem mi no save kam wetem yu blong faet agensem ol enemi blong yu?” 9 Nao Akis i ansa long Deved se: “Long lukluk blong mi, yu yu gud nomo olsem wan enjel blong God.+ Be ol prins blong Filistia oli talem se: ‘Yu no mas letem hem i go antap wetem yumi blong faet.’ 10 Taswe tumoro long eli moning, yu wetem ol man we oli kam wetem yu, yufala i girap mo yufala i aot long ples ya taem i stat blong delaet.”
11 Ale Deved wetem ol man blong hem oli girap long eli moning, mo oli gobak long ples blong ol man Filistia, be ol man Filistia oli go antap long Jisrehel.+