Esra

10 Taem Esra i stap long fored blong haos blong tru God, i stap krae mo i ledaon we fes blong hem i go long graon, i stap prea+ mo talemaot sin blong ol man blong hem, wan bigfala grup blong ol man, ol woman, mo ol pikinini blong Isrel oli kam hivap raon long hem, mo olgeta tu oli krae we oli krae. 2 Nao Sekania we i boe blong Jehiel+ we i kamaot long ol boe blong Elam,+ i talem long Esra se: “Mifala i no holemstrong long God blong yumi, taem mifala i maredem* ol woman blong ol kantri raonabaot long yumi.+ Be nating se i olsem, i gat hop yet blong ol man Isrel. 3 Naoia, i gud yumi mekem wan kontrak wetem God blong yumi,+ se bambae yumi sanemaot evri waef ya wetem ol pikinini blong olgeta, stret olsem we Jehova mo ol man we oli gat bigfala respek* long komanmen blong God blong yumi,+ oli talem. I gud yumi mekem olsem we Loa i talem. 4 Yu girap. Hemia wok blong yu blong stretem bisnes ya, mo mifala bambae i stap wetem yu. Tingting blong yu i mas strong mo yu mas tekem aksen.”

5 Nao Esra i girap mo i mekem ol lida blong ol pris, ol Livaet, mo olgeta man Isrel oli mekem wan strong promes blong mekem samting ya we oli bin talem.+ Ale olgeta oli mekem wan strong promes. 6 Nao Esra i girap long fored blong haos blong tru God mo i go long rum* blong Jehohanan we i boe blong Eliasib. Mo nating se hem i go long ples ya, be hem i no kakae wan kakae mo i no dring wota, from we hem i stap sore from ol man ya we oli bin stap long narafala kantri we oli no holemstrong long God.+

7 Biaen oli talemaot long olgeta ples long Juda mo Jerusalem se evriwan ya we oli bin stap long narafala kantri, oli mas kam tugeta long Jerusalem. 8 Mo folem desisen we ol prins mo ol elda oli mekem, eni man we i no kam long ples ya afta long tri dei, bambae oli tekemaot* evri samting blong hem, mo bambae hem i no moa joen wetem kongregesen blong olgeta we oli bin stap long narafala kantri.+ 9 From samting ya, olgeta man Juda mo Benjamin oli kam wanples long Jerusalem bifo long namba 3 dei, hemia long namba 20 dei blong namba 9 manis. Olgeta evriwan oli stap sidaon long yad blong haos blong tru God, mo oli stap seksek from samting we bambae i hapen mo from bigfala ren tu.

10 Nao pris ya Esra i stanap mo i talem long olgeta se: “Yufala i no holemstrong long God, taem yufala i maredem ol woman blong ol narafala kantri,+ mo hemia i mekem se yufala i mekem fol blong Isrel i kam antap moa. 11 Naoia, yufala i mas talemaot sin blong yufala long Jehova we i God blong ol olfala blong yufala, mo yufala i mas mekem wil blong hem. Yufala i mas stap longwe long ol man blong ol kantri raonabaot mo yufala i sanemaot ol waef blong yufala we oli blong ol narafala kantri.”+ 12 Nao ful kongregesen i ansa long wan bigfala voes se: “Bambae mifala i mekem stret olsem we yu talem. 13 Be i gat plante man long ples ya, mo hemia i taem blong ren. Taswe mifala i no save stanap aotsaed, mo bambae yumi no stretem bisnes ya long wan o tu dei nomo, from we mifala i mekem wan bigfala sin agens long God. 14 Taswe plis, i gud ol prins blong yumi oli stap long ples ya mo oli lukluk long bisnes ya long bihaf blong ful kongregesen.+ Mo olgeta evriwan long ol taon blong yumi, we oli maredem ol woman blong ol narafala kantri, bambae oli kam long ples ya long wan stret taem, olgeta wetem ol elda mo ol jaj blong ol taon ya wanwan. Olsem nao bambae yumi stretem bisnes ya, mo kros blong God we i olsem faea bambae i gowe long yumi.”

15 Be Jonatan we i boe blong Asahel, mo Jahsea we i boe blong Tikvaha, tufala i no agri long samting ya. Mo Mesulam wetem Sabetae we tufala i Livaet,+ tufala i sapotem tufala ya. 16 Be olgeta ya we oli bin stap long narafala kantri, olgeta oli mekem samting we oli bin agri long hem. Mo pris ya Esra wetem olgeta we oli hed long haos blong papa blong olgeta, we oli bin jusumaot nem blong olgeta, oli kam wanples olgeta nomo blong lukluk long bisnes ya. Hemia long faswan dei blong namba 10 manis. 17 Nao long faswan dei blong faswan manis, oli stretem finis bisnes ya blong olgeta man we oli bin maredem ol woman blong ol narafala kantri. 18 Mo oli faenemaot se sam long ol boe blong ol pris tu oli maredem ol woman blong ol narafala kantri.+ Long ol boe blong Jesua+ we i boe blong Jehosadak mo ol brata blong hem, i gat Mahasea, Eliesa, Jarib, mo Gedalia. 19 Be olgeta oli promes* blong sanemaot ol waef blong olgeta, mo from we oli gat fol, bambae oli givim wan man sipsip from fol ya blong olgeta.+

20 Long ol boe blong Hime,+ i gat Hanani mo Sebadia. 21 Mo long ol boe blong Harim,+ i gat Mahasea, Elaejah, Semaea, Jehiel, mo Usia. 22 Mo long ol boe blong Pasuru,+ i gat Elioenae, Mahasea, Ismael, Netanel, Josabad, mo Eleasa. 23 Mo long ol Livaet, i gat Josabad, Simei, Kelaea (hemia Kelita), Petahia, Juda, mo Eliesa. 24 Mo long ol man blong singsing, i gat Eliasib. Mo long ol man blong gad long get, i gat Salum, Telem, mo Uri.

25 Mo long ol man Isrel, long ol boe blong Paros,+ i gat Ramia, Isia, Malkaejah, Mijamin, Eleasara, Malkaejah, mo Benaea. 26 Mo long ol boe blong Elam,+ i gat Matania, Sekaraea, Jehiel,+ Abdi, Jeremot, mo Elaejah. 27 Mo long ol boe blong Satu,+ i gat Elioenae, Eliasib, Matania, Jeremot, Sabad, mo Asisa. 28 Mo long ol boe blong Bebae,+ i gat Jehohanan, Hanania, Sabae, mo Atlae. 29 Mo long ol boe blong Bani, i gat Mesulam, Maluk, Adaea, Jasub, Seal, mo Jeremot. 30 Mo long ol boe blong Pahatmoab,+ i gat Adna, Kelal, Benaea, Mahasea, Matania, Bejalehel, Binui, mo Manase. 31 Mo long ol boe blong Harim,+ i gat Eliesa, Isaejah, Malkaejah,+ Semaea, Shimeon, 32 Benjamin, Maluk, mo Semaria. 33 Long ol boe blong Hasum,+ i gat Matenae, Matataha, Sabad, Elifelet, Jeremae, Manase, mo Simei. 34 Long ol boe blong Bani, i gat Mahadae, Amram, Huel, 35 Benaea, Bedea, Keluhi, 36 Vania, Meremot, Eliasib, 37 Matania, Matenae, mo Jahasu. 38 Mo long ol boe blong Binui, i gat Simei, 39 Selemia, Natan, Adaea, 40 Maknadebae, Sasae, Sarai, 41 Asarel, Selemia, Semaria, 42 Salum, Amaria, mo Josef. 43 Mo long ol boe blong Neboho, i gat Jeiel, Matitia, Sabad, Sebina, Jadae, Joel, mo Benaea. 44 Olgeta evriwan ya, oli maredem ol woman blong ol narafala kantri,+ mo oli sanemaot ol waef ya wetem ol boe blong olgeta oli gobak.+