Fas Buk Blong Kronikel

27 Hemia ol grup blong ol man Isrel we oli kam insaed mo oli goaot evri manis blong wan fulyia. Long ol grup ya, i gat olgeta we oli hed long haos blong papa blong olgeta, ol lida blong taosen man mo ol lida blong handred man,+ mo ol ofisa blong olgeta we oli mekem minista wok blong givhan long king+ blong lukaot long ol grup ya. I gat 24,000 man long wanwan long ol grup ya.

2 Man we i lukaot long faswan grup we i kam long faswan manis, hemia Jasobeam+ we i boe blong Sabdiel, mo i gat 24,000 man long grup blong hem. 3 Long ol boe blong Peres,+ hem nao i hed blong olgeta lida blong ol grup we oli jusumaot olgeta blong oli wok long faswan manis. 4 Man we i lukaot long grup we i kam long seken manis, hemia Dodai+ we i wan laen blong Ahoha,+ mo Miklot nao i lida blong grup ya, mo i gat 24,000 man long grup blong hem. 5 Lida blong namba 3 grup we oli jusumaot blong oli wok long namba 3 manis, hemia Benaea+ we i boe blong jif pris ya Jehoeada,+ mo i gat 24,000 man long grup blong hem. 6 Benaea ya i wan long ol teti strong man blong faet mo hem nao i bos blong ol teti man ya. Mo boe blong hem Amisabad i lukaot long grup blong hem. 7 Man we i lukaot long namba 4 grup we i kam long namba 4 manis, hemia Asahel+ we i brata blong Joab,+ mo biaen boe blong hem Sebadia i tekem ples blong hem. Mo i gat 24,000 man long grup blong hem. 8 Namba 5 lida we i lukaot long namba 5 manis, hemia Samut we i wan Israhaet, mo i gat 24,000 man long grup blong hem. 9 Man we i lukaot long namba 6 grup we i kam long namba 6 manis, hemia Ira+ we i boe blong Ikes blong Tekoa,+ mo i gat 24,000 man long grup blong hem. 10 Man we i lukaot long namba 7 grup we i kam long namba 7 manis, hemia Helej+ we i wan man Pelonaet long laen blong Efrem, mo i gat 24,000 man long grup blong hem. 11 Man we i lukaot long namba 8 grup we i kam long namba 8 manis, hemia Sibekae+ we i wan man Husa long laen blong Jeraha,+ mo i gat 24,000 man long grup blong hem. 12 Man we i lukaot long namba 9 grup we i kam long namba 9 manis, hemia Abiesa+ blong Anatot+ long laen blong Benjamin, mo i gat 24,000 man long grup blong hem. 13 Man we i lukaot long namba 10 grup we i kam long namba 10 manis, hemia Maharae+ blong Netofa long laen blong Jeraha,+ mo i gat 24,000 man long grup blong hem. 14 Man we i lukaot long namba 11 grup we i kam long namba 11 manis, hemia Benaea+ blong Piraton long laen blong Efrem, mo i gat 24,000 man long grup blong hem. 15 Man we i lukaot long namba 12 grup we i kam long namba 12 manis, hemia Heldae blong Netofa long laen blong Otniel, mo i gat 24,000 man long grup blong hem.

16 Hemia ol lida blong ol traeb blong Isrel: Long laen blong Ruben, Eliesa we i boe blong Sikri i lida. Long laen blong Simeon, Sefatia we i boe blong Mahaka i lida. 17 Long laen blong Livae, Hasabia we i boe blong Kemuel i lida. Long laen blong Eron, Jadok i lida. 18 Long laen blong Juda, Elihu+ we i wan long ol brata blong Deved, i lida. Long laen blong Isakara, Omri we i boe blong Maekel i lida. 19 Long laen blong Sebulun, Ismaea we i boe blong Obadaea i lida. Long laen blong Naftali, Jerimot we i boe blong Asriel i lida. 20 Long laen blong Efrem, Hosia we i boe blong Asasia i lida. Long haf traeb blong Manase, Joel we i boe blong Pedaea i lida. 21 Long haf traeb blong Manase long Gilead, Ido we i boe blong Sekaraea i lida. Long laen blong Benjamin, Jajiel we i boe blong Abnere i lida.+ 22 Long laen blong Dan, Asarel we i boe blong Jeroham i lida. Hemia nao ol prins long ol traeb blong Isrel.

23 Deved i no kaontem ol man we oli gat 20 yia i godaon, from we Jehova i bin promes blong mekem ol man Isrel oli kam plante olsem ol sta long heven.+ 24 Joab we i boe blong Jeruia i stat blong kaontem ol man, be i no finisim wok ya. From samting ya, kros blong God i kam agensem ol man Isrel,*+ mo oli no raetemdaon namba ya long buk blong histri blong taem blong King Deved.

25 Man we i lukaot long ol sas samting blong king,+ hemia Asmavet we i boe blong Adiel. Mo Jonatan we i boe blong Usia, hem i lukaot long ol stohaos* we oli stap long ol open ples, long ol taon, long ol vilej, mo long ol taoa. 26 Man we i lukaot long olgeta we oli wok long garen, hemia Esri we i boe blong Kelub. 27 Mo Simei we i blong Rama, i lukaot long ol plantesen blong grep. Mo Sabdi we i wan man Sifmaet i lukaot long ol grep we oli yusum blong mekem waen. 28 Man we i lukaot long ol plantesen blong olif mo long ol tri ya sikamo+ we oli stap long Sefela,+ hemia Balanan blong Geda. Mo Joas i lukaot long ples blong putumgud ol oel. 29 Man we i lukaot long ol buluk we oli stap kakae gras long Saron,+ hemia Sitrae blong Saron. Mo Safat we i boe blong Adlae, hem i lukaot long ol buluk we oli stap long ol levelples.* 30 Man we i lukaot long ol kamel, hemia Obil long laen blong Ismael. Mo man we i lukaot long ol dongki,* hemia Jedea blong Meronot. 31 Mo man we i lukaot long ol sipsip, hemia Jasis we i wan man Hegaraet. Olgeta evriwan ya oli lida we oli lukaot long olting blong King Deved.

32 Jonatan+ we i nefiu blong Deved, hem i wan advaesa, hem i wan man we i kasemsave ol samting mo i wan sekretari, mo Jehiel we i boe blong Hakmoni, hem i lukaot long ol boe blong king.+ 33 Ahitofel+ i wan advaesa blong king, mo Husae+ we i wan laen blong Aki, hem i fren blong king.* 34 Afta long Ahitofel, i gat Jehoeada we i boe blong Benaea,+ mo Abiata.+ Mo Joab+ i lida blong ol ami blong king.