Eksodas

27 “Bambae yufala i wokem wan olta long wud blong akasia.+ Longfala blong hem bambae i faef kiubit,* mo bigfala blong hem i faef kiubit. Olta ya i mas skwea mo hae blong hem bambae i tri kiubit.+ 2 Bambae yufala i wokem wan hon+ long ol fo kona blong olta ya, mo ol hon ya bambae oli haf blong olta ya, mo yufala i mas blokem olta ya long kopa.+ 3 Bambae yufala i wokem ol savel, ol bol, ol fok, ol faea holda, mo ol baket blong karemaot ol asis.* Mo evri samting ya bambae yufala i wokem long kopa.+ 4 Bambae yufala i yusum kopa blong wokem wan bigfala netwaea long olta ya, blong bonem sakrefaes long hem. Mo bambae yufala i yusum kopa blong wokem wan ring long ol fo kona blong olta ya. 5 Bambae yufala i putum netwaea ya aninit long strap blong olta ya, mo bambae i stat long ples ya go kasem medel blong olta ya. 6 Bambae yufala i wokem ol stik blong olta ya long wud blong akasia, mo bambae yufala i blokem olgeta long kopa. 7 Bambae yufala i pusum ol stik ya i go insaed long ol ring long tufala saed blong olta ya, taem yufala i karem olta ya.+ 8 Bambae yufala i wokem olta ya long ol plang, mo bambae i olsem wan bigfala bokis we i emti. Yufala i mas wokem stret olsem we mi soemaot long yu long bigfala hil ya.+

9 “Bambae yufala i wokem wan yad+ blong tabenakel* ya. Long saed i go long saot, bambae yufala i hangem ol bigfala kaliko we yufala i wokem long gudfala tred ya linen we oli wivim tugeta, blong blokem yad ya. Longfala blong kaliko ya long wan saed bambae i 100 kiubit.+ 10 Bambae i gat 20 bigfala pos mo 20 stamba ples blong olgeta long kopa. Bambae i gat ol huk blong ol bigfala pos ya mo ol joen blong* olgeta long silva. 11 Mo ol bigfala kaliko we bambae yufala i hangem long saed i go long not, longfala blong hem bambae i 100 kiubit, mo bambae i gat 20 bigfala pos blong hem mo 20 stamba ples blong olgeta we yufala i wokem long kopa. Mo ol huk blong bigfala pos ya mo ol joen blong* olgeta, bambae yufala i wokem long silva. 12 Long saed i go long wes blong yad ya, bambae yufala i hangem ol bigfala kaliko we longfala blong olgeta bambae i 50 kiubit, wetem ten bigfala pos mo ten stamba ples blong olgeta. 13 Mo long saed i go long is,* bigfala blong yad ya bambae i 50 kiubit. 14 Long wansaed, bambae yufala i hangem ol bigfala kaliko we longfala blong olgeta bambae i 15 kiubit, wetem tri bigfala pos mo tri stamba ples blong olgeta.+ 15 Mo long narasaed, bambae yufala i hangem ol bigfala kaliko we longfala blong olgeta bambae i 15 kiubit, wetem tri bigfala pos mo tri stamba ples blong olgeta.

16 “Long doa blong yad ya, bambae yufala i hangem wan skrin we longfala blong hem i 20 kiubit. Skrin ya, bambae yufala i wokem long blu tred, pepol wul, tred we i laet red, mo gudfala tred ya linen we oli wivim tugeta.+ Mo bambae i gat fo bigfala pos mo fo stamba ples blong olgeta.+ 17 Evri bigfala pos blong yad ya bambae oli gat ol samting blong fasem olgeta, we oli wokem long silva mo ol huk we oli wokem long silva. Be ol stamba ples blong ol bigfala pos ya, bambae yufala i wokem long kopa.+ 18 Fenis blong yad ya, longfala blong hem bambae i 100 kiubit,+ mo bigfala blong hem bambae i 50 kiubit, mo hae blong hem bambae i 5 kiubit. Fenis ya bambae oli wokem long gudfala kaliko ya linen we oli wivim, mo ol stamba ples blong ol bigfala pos blong hem, bambae oli wokem long kopa. 19 Mo olgeta samting blong yusum long tabenakel wetem ol tul blong mekem wok, mo ol aean blong holemtaet rop blong tabenakel mo fenis blong yad, bambae yufala i wokem long kopa.+

20 “Bambae yu talem long ol laen blong Isrel blong oli givim olif oel we i klin gud long yu, blong yu yusum long ol laet, blong oli save gohed blong laet oltaem.+ 21 Insaed long tent blong miting,* long rum we i stap aotsaed long bigfala kaliko we i stap klosap long bokis blong Loa,+ Eron wetem ol boe blong hem bambae oli lukaot long ol laet blong oli laet long fes blong Jehova,+ long sapa go kasem long moning. Hemia bambae i wan loa we ol laen blong Isrel wetem ol jeneresen blong olgeta we bambae oli kamaot biaen long olgeta, oli mas folem oltaem.+