Fas Samuel

16 Nao biaen, Jehova i talem long Samuel se: “?Bambae yu sore from Sol gogo kasem wetaem?+ Mi mi no moa wantem se hem i rul long Isrel.+ Yu fulumap hon blong yu wetem oel+ mo yu go. Bambae mi sanem yu yu go long Jese+ we i blong Betlehem, from we mi mi jusumaot wan boe blong hem blong i king.”+ 2 Be Samuel i talem se: “?Bambae mi go olsem wanem? Sipos Sol i harem samting ya, bambae hem i kilim mi mi ded.”+ Be Jehova i talem se: “Yu tekem wan smol kao wetem yu mo yu talem se: ‘Mi mi kam blong mekem sakrefaes long Jehova.’ 3 Yu invaetem Jese i kam long sakrefaes ya, biaen bambae mi talemaot samting we yu mas mekem. Man we bambae mi jusumaot, yu mas makemaot hem long bihaf blong mi.”+

4 Nao Samuel i mekem samting we Jehova i talem. Taem hem i kamtru long Betlehem,+ ol elda blong taon oli mitim hem be oli fraet, nao oli askem se: “?Yu kam long pis no olsem wanem?” 5 Nao hem i talem se: “Mi kam long pis. Mi kam blong mekem sakrefaes long Jehova. Yufala i go mekem yufala i tabu, mo yufala i kam wetem mi blong mekem sakrefaes.” Ale hem i mekem Jese mo ol boe blong hem oli kam tabu, biaen hem i singaot olgeta oli kam long sakrefaes. 6 Taem oli kam insaed mo hem i luk Eliab,+ hem i talem se: “Man ya we i stap stanap long fored blong Jehova, ating hem nao we hem i makemaot.” 7 Be Jehova i talem long Samuel se: “Yu no tingbaot se hem i naes mo i longfala,+ from we mi mi no wantem hem. Fasin blong God blong lukluk samting i no sem mak long fasin blong man. Man i lukluk bodi nomo, be Jehova i lukluk samting we i stap long hat.”+ 8 Biaen, Jese i singaot Abinadab+ mo i tekem hem i kam long Samuel, be Samuel i talem se: “Hem tu Jehova i no jusum.” 9 Nao Jese i tekem Samah+ i kam, be Samuel i talem se: “Hem tu Jehova i no jusum.” 10 Jese i tekem seven boe blong hem oli kam long Samuel, be Samuel i talem se: “Jehova i no jusum wan long olgeta.”

11 Ale Samuel i askem long Jese se: “?Hemia nao evri boe blong yu?” Jese i se: “Laswan long olgeta+ i aot, hem i go lukaot long ol sipsip.”+ Nao Samuel i talem se: “Yu sanem wan man i go tekem hem i kam, from we bambae yumi no kakae gogo kasem we hem i kam.” 12 Ale Jese i sanem wan man i go mo i tekem hem i kam. Boe ya i yang mo i naes, ae blong hem i naes, mo bodi blong hem i strong.+ Nao Jehova i talem se: “!Hem nao, yu girap, yu makemaot hem!”+ 13 Nao Samuel i tekem hon we i gat oel long hem+ mo i makemaot Deved long fored blong ol brata blong hem. Mo spirit blong Jehova i givim paoa long Deved stat long dei ya i go.+ Biaen Samuel i aot mo i gobak long Rama.+

14 Nao spirit blong Jehova i gowe long Sol.+ Mo Jehova i letem se rabis tingting blong Sol i mekem hem i fraet bitim mak.*+ 15 Ale ol man blong wok blong Sol oli talem long hem se: “Yu luk, God i letem se rabis tingting blong yu i stap mekem yu yu fraet bitim mak. 16 King blong mifala, plis, i gud yu talem long ol man blong wok blong yu blong oli go lukaot wan man we i gat gudhan blong plei long hap.+ Olsem nao, taem rabis tingting blong yu i mekem yu yu fraet bitim mak, bambae man ya i plei long hap, nao bambae yu harem gud.” 17 Nao Sol i talem long ol man blong wok blong hem se: “Plis, yufala i go lukaot wan man we i gat gudhan blong plei, mo yufala i tekem hem i kam long mi.”

18 Wan man blong wok blong hem i talem se: “!Yu luk! Man Betlehem ya Jese i gat wan boe. Mi mi luk we hem i gat gudhan blong plei, hem i no fraet, mo hem i wan strong man blong faet.+ Hem i save toktok gud, hem i naes,+ mo Jehova i stap wetem hem.”+ 19 Nao Sol i sanem mesej i go long Jese se: “Yu sanem boe blong yu Deved we i stap lukaot long ol sipsip, i kam long mi.”+ 20 Ale Jese i sanem Deved i go long Sol, wetem bred, wan skin botel blong waen, mo wan smol nani. Hem i putum ol samting ya long wan dongki mo Deved i tekem i go long Sol. 21 Nao Deved i kam stap wetem Sol mo i stap wok blong hem.+ Nao Sol i lavem hem tumas, mo Deved i kam man blong karem ol tul blong faet blong Sol. 22 Biaen Sol i sanem mesej long Jese se: “Plis, yu letem Deved i stap wok blong mi, from we mi mi glad tumas long hem.” 23 Nao taem God i letem rabis tingting blong Sol i mekem hem i fraet, Deved i tekem hap mo i plei, nao Sol i harem gud, mo tingting blong hem i kam gud bakegen.+