Jeremaea
31 Mo Jehova i talem se: “Long taem ya, bambae mi mi kam God blong olgeta famle blong Isrel, mo olgeta bambae oli kam ol man blong mi.”+
2 Hemia samting we Jehova i talem, i se:
“Ol man we oli no bin ded long naef blong faet, mi mi kaen long olgeta long draeples
Taem Isrel i stap wokbaot i go long ples blong spel blong hem.”
3 Jehova i aot long wan ples longwe i kamtru long mi mo i talem se:
“Mi mi lavem yu mo lav ya i stap olwe.
Taswe mi mi pulum yu yu kam long mi from fasin blong mi blong lavem man oltaem.*+
4 Bambae mi wokem gud yu bakegen mo bambae yu kam gud bakegen.+
O gel Isrel we yu no save man yet, bambae yu holem ol tamborin blong yu bakegen
5 Bambae yu planem ol plantesen blong grep bakegen long ol bigfala hil blong Sameria,+
Ol man blong planem samting bambae oli planem ol samting mo oli harem gud long ol frut blong olgeta.+
6 From i gat dei i stap kam we ol wajman long ol bigfala hil blong Efrem bambae oli singaot bigwan se:
‘Yufala i girap, i gud yumi go antap long Saeon, long Jehova God blong yumi.’”+
7 From hemia samting we Jehova i talem, i se:
“Yufala i singaot i go long Jekob we yufala i glad tumas.
Yufala i singaot we yufala i harem gud, from we yufala i winim ol nesen.+
Yufala i talemaot, yufala i singsing mo yufala i se:
‘O Jehova, yu sevem ol man blong yu, hemia smol haf blong ol man Isrel we oli stap yet.’+
8 Bambae mi tekem olgeta long kantri ya long not i kambak.+
Mo bambae mi tekem olgeta long ol laswan ples long wol, mi hivimap olgeta wanples.+
Long medel blong olgeta, bambae i gat ol blaenman, olgeta we leg blong olgeta i nogud,+
Woman we i gat bel mo woman we i stap bonem pikinini, olgeta evriwan oli kam.
Bambae oli kambak long ples ya olsem wan bigfala kongregesen nomo.+
9 Bambae oli kam we oli stap krae.+
Bambae mi lidim olgeta taem oli plis long mi blong mi sore long olgeta.
Bambae mi lidim olgeta i go long ol wota we oli stap ron,*+
Long wan rod we i level we bambae i no mekem olgeta oli stambol.
From mi mi olsem Papa blong Isrel, mo Efrem hem i fasbon blong mi.”+
10 Ol nesen, yufala i harem tok blong Jehova,
Mo yufala i talemaot long ol aelan we oli stap longwe, se:+
“Man we i ronemaot ol man Isrel oli go stap wanwan olbaot, bambae i hivimap olgeta wanples.
Bambae hem i stap wajem olgeta olsem wan man blong lukaot long sipsip i mekem long ol sipsip blong hem.+
11 From Jehova bambae i pembak Jekob+
Mo i tekemaot* hem long han blong man ya we i strong moa long hem.+
12 Bambae oli kam long hae ples long Saeon mo oli singaot from oli glad+
Mo bambae oli hapi from gudfala fasin blong* Jehova,
Mo from ol sid mo ol niu waen+ mo ol oel,
Mo from ol yang sipsip mo ol yang animol.+
13 “Long taem ya, gel ya we i no save man yet bambae i glad i stap danis,
Mo ol yang man mo ol olfala man tu oli danis.+
Bambae mi jenisim harem nogud blong olgeta i kam bigfala glad.+
Bambae mi mekem oli harem gud mo mi mekem oli glad, oli no moa sore.+
14 Bambae mi mekem ol pris* oli harem gud long plante samting,*
Mo ol man blong mi bambae oli harem gud long gudfala fasin blong mi,”+ hemia nao tok blong Jehova.
15 Hemia samting we Jehova i talem, i se:
‘Wan voes i kamaot long Rama,+ hem i krae mo i stap singaot bigwan:
Hem i no wantem we ol man oli kam toktok gud long hem from ol boe blong hem,
From we oli no moa stap.’”+
16 Hemia samting we Jehova i talem, i se:
“‘Yu holemtaet voes blong yu blong yu no moa krae mo wota blong ae blong yu blong i no moa ron,
From i gat wan pei blong ol wok blong yu,’ hemia nao tok blong Jehova.
‘Bambae oli aot long kantri blong ol enemi, oli kambak.’+
17 ‘Mo long fiuja, yu gat wan hop,’+ hemia nao tok blong Jehova.
‘Yes, ol boe blong yu bambae oli gobak long ol teritori blong olgeta.’”+
18 “Mi talem tru se mi harem Efrem i stap krae i se,
‘Yu yu stretem mi finis, mo naoia oli stretem mi finis,
Olsem wan smol buluk we man i no bin trenem.
Yu tekembak mi, mo bambae mi mi rere nomo blong tanraon i kambak,
From yu yu Jehova God blong mi.
19 From afta we mi tanemraon i kambak, mi rigret from samting we mi mekem,+
Taem oli mekem mi kasem save, mi harem nogud tumas nao mi kilim leg blong mi antap.
Mi mi sem mo ol man oli daonem mi,+
Yes, mi karem ol strong tok ya from ol samting we mi mekem taem mi yangfala.’”
20 “?Yu no ting se Efrem i wan boe we i sas tumas long mi, wan pikinini we mi lavem hem tumas?+
From nating se mi tok agensem hem plante taem, be mi tingbaot hem yet.
Taswe ol filing blong mi oli pusum mi blong halpem hem.*+
Mo i sua se bambae mi sore long hem,” hemia nao tok blong Jehova.+
21 “Yu putum ol mak long ol rod blong yu,
Mo yu stanemap ol pos olsem saen.+
Yu tingting gud long ol bigrod, hemia ol rod we yu mas folem.+
O gel Isrel we yu no save man yet, yu kambak, yu kambak long ol taon ya blong yu.
22 O dota we yu no holemstrong, ?bambae yu gat tu tingting gogo kasem wetaem?
From Jehova i wokem wan niu samting long wol finis:
Wan woman bambae i traehad blong biaenem wan man.”
23 Hemia samting we Jehova komanda blong ol ami, we i God blong Isrel i talem, i se: “Taem mi tekembak ol man blong olgeta we oli stap kalabus, ol man bambae oli talem ol tok ya bakegen long kantri ya Juda mo long ol taon blong hem se: ‘O yu ples blong stret fasin,+ yu bigfala hil we i tabu,+ i gud Jehova i blesem yu.’ 24 Mo long Juda, olgeta man long hem mo olgeta man long ol taon blong hem, bambae oli laef wanples nomo, ol fama mo olgeta we oli stap lidim ol sipsip.+ 25 From bambae mi mekem man* we i taed tumas i harem gud, mo mi givim paoa long man* we i no gat paoa.”+
26 Stret long taem ya, mi wekap mo mi openem ae blong mi, mo long taem ya we mi slip mi harem gud tumas.
27 “!Yu luk! I gat ol dei i stap kam we bambae mi saksakem sid* blong man mo sid blong ol animol long haos blong Isrel mo long haos blong Juda,”+ hemia nao tok blong Jehova.
28 “Mo olsem we mi bin wajem olgeta blong rutumaot olgeta, mo pulumdaon olgeta, mo terterem olgeta, mo distroem olgeta mo blong spolem olgeta,+ long sem fasin bambae mi wajem olgeta blong bildimap olgeta mo blong planem olgeta,”+ hemia nao tok blong Jehova. 29 “Long ol dei ya, bambae oli no moa talem se: ‘Ol papa oli kakae ol grep we i konkon, be ol tut blong ol boe nao i kolkol from.’*+ 30 Be biaen olgeta wanwan bambae oli ded from prapa mastik blong olgeta. Eni man we i kakae grep we i konkon, bambae tut blong hem nomo i kolkol from.”
31 Mo Jehova i talem se: “!Yu luk! I gat ol dei i stap kam we bambae mi mekem wan niufala kontrak wetem haos blong Isrel mo wetem haos blong Juda.+ 32 Bambae hem i no olsem kontrak ya we mi mekem wetem ol olfala blong olgeta long dei ya we mi bin holem han blong olgeta, mi lidim olgeta oli aot long kantri ya Ijip,+ hemia ‘kontrak blong mi we oli brekem,+ nating se mi mi tru masta* blong olgeta,’ hemia nao tok blong Jehova.”
33 Jehova i talem se: “Afta long ol dei ya, kontrak we bambae mi mekem wetem haos blong Isrel i olsem: Mi bambae mi putum loa blong mi insaed long olgeta,+ mo bambae mi raetem long hat blong olgeta.+ Mo mi bambae mi kam God blong olgeta, mo olgeta bambae oli kam ol man blong mi.”+
34 “Mo bambae i no gat wan long olgeta we i save go tijim neba blong hem mo brata blong hem se: ‘!Yufala i mas save Jehova!’+ from we bambae olgeta evriwan oli save mi, stat long olgeta we oli no gat nem i go kasem ol haeman,”+ hemia nao tok blong Jehova. “From bambae mi fogivim ol rong blong olgeta, mo bambae mi no moa tingbaot sin blong olgeta.”+
35 Hemia samting we Jehova,
God ya we i givim san blong i laet long dei,
Mo ol loa* blong mun mo ol sta blong oli laet long naet,
Mo i mekem solwota i raf mo i mekem ol wef blong hem oli mekem bigfala noes,
We nem blong hem Jehova komanda blong ol ami,+ i talem, i se:
36 “‘Sipos wan dei ol rul ya oli foldaon,
Ale long taem ya nao ol pikinini blong Isrel bambae oli no moa stap olsem wan nesen we i stap oltaem long fes blong mi,’ hemia nao tok blong Jehova.”+
37 Hemia samting we Jehova i talem, i se: “‘Sipos man i save mesarem heven antap mo i save go lukluk ol fandesen blong wol daon, ale long taem ya nao mi save lego olgeta pikinini blong Isrel from olgeta samting we oli bin mekem,’ hemia nao tok blong Jehova.”+
38 Jehova i talem se: “!Yu luk! I gat ol dei i stap kam, we bambae oli bildim taon ya+ blong i go long Jehova, stat long Taoa Blong Hananehel+ go kasem Get Long Kona.+ 39 Mo bambae oli pulum teplaen+ i go stret long hil blong Gareb, mo bambae i tanem i go long Goa. 40 Mo olgeta vali* blong ol dedbodi mo ol asis,* mo ol saed blong ol hil i go kasem Kedron Vali,+ yes olgeta ples ya i go kasem kona blong Get Blong Hos+ saed i go long is, bambae oli olsem wan tabu samting long Jehova.+ Bambae ol man oli no moa save rutumaot o brebrekemdaon bakegen.”