Eksodas

17 Nao ful asembli blong Isrel i aot long draeples ya Sin,+ mo i stap muv long wan ples i go long wan narafala ples, folem oda blong Jehova.+ Ale oli mekem kamp blong olgeta long Refidim,+ be long ples ya i no gat wota blong ol man oli dring.

2 Ale ol man oli stat blong rao long Moses,+ oli se: “Yu givim wota blong mifala i dring.” Be Moses i talem long olgeta se: “?From wanem yufala i stap rao long mi? ?From wanem yufala i stap gohed blong traem Jehova?”+ 3 Be ol man ya oli tosta tumas, nao oli stap komplen agens long Moses,+ oli se: “?From wanem yu tekemaot mifala long Ijip? ?Yu wantem se mifala i tosta gogo mifala i ded wetem ol boe blong mifala, mo ol animol blong mifala?” 4 Nao Moses i krae i go long Jehova se: “?Bambae mi mekem wanem long ol man ya? !I no longtaem bambae oli stonem mi!”

5 Nao Jehova i talem long Moses se: “Yu tekem stik ya we yu bin kilim Nael Reva long hem,+ mo yu jusum sam elda blong Isrel blong oli folem yu, mo yu pas long fored blong ol man. Yu tekem stik ya mo yu wokbaot i go. 6 !Yu luk! Bambae mi stanap long fored blong yu long bigfala ston ya long Horeb. Yu mas kilim ston ya, mo wota bambae i kamaot long hem, nao ol man oli save dring.”+ Ale Moses i mekem samting ya long fes blong ol elda blong Isrel. 7 Taswe hem i putum nem blong ples ya se Masaha*+ mo Meriba,*+ from raorao we ol laen blong Isrel oli mekem mo from we oli traem Jehova,+ taem oli talem se: “?Jehova i stap wetem yumi o no?”

8 Biaen ol laen blong Amalek+ oli kam faet agensem Isrel long Refidim.+ 9 Nao Moses i talem long Josua+ se: “Yu jusum sam man, blong yufala i go faet agensem ol laen blong Amalek. Tumoro bambae mi go stanap long top blong hil, mo bambae mi holem stik blong tru God long han blong mi.” 10 Ale Josua i mekem olsem we Moses i talem long hem,+ hem i go faet agensem ol laen blong Amalek. Mo Moses, Eron, mo Huru+ oli go antap long top blong hil.

11 Taem Moses i leftemap tufala han blong hem i stap antap, ol laen blong Isrel oli win, be taem hem i slakem tufala han blong hem i godaon, ol laen blong Amalek oli win. 12 Taem tufala han blong Moses i kam taed, Eron mo Huru i karem wan ston i kam, nao Moses i sidaon long hem. Nao tufala i stanap long saed blong hem, wan long wan saed, wan long nara saed mo tufala i holem han blong Moses i stap antap nomo. Nao han blong Moses i stap olsem gogo kasem we san i draon. 13 Nao Josua i winim ol laen blong Amalek long naef blong faet.+

14 Ale Jehova i talem long Moses se: “Yu raetemdaon samting ya long wan buk, blong ol man oli no fogetem, mo yu talem bakegen long Josua se: ‘Bambae mi waepemaot ol laen blong Amalek aninit long heven, we bambae ol man oli no moa save tingbaot olgeta bakegen samtaem.’”+ 15 Nao Moses i wokem wan olta mo i putum nem blong hem se Jehova-nisae,* 16 mo i talem se: “From we han blong Amalek i go agensem tron* blong Jah,+ Jehova bambae i faet oltaem wetem Amalek mo ol jeneresen we bambae oli kamaot biaen long hem.”+