Ol Sam
Long daerekta. Folem tiun blong Seminit.* Singsing blong Deved.
12 O Jehova, yu sevem mi from we i no moa gat wan man we i holemstrong,
Olgeta we oli stap tru long yu oli lus finis long medel blong ol man.
2 Oli stap talem ol giaman tok long olgeta bakegen,
Oli yusum lips blong olgeta blong switim ol man mo oli talem samting, be oli giaman nomo.*+
3 Jehova bambae i katemaot lips blong olgeta we oli stap tok swit
Mo tang we i stap tok flas tumas,+
4 Hemia olgeta we oli talem se: “Tang blong mifala bambae i mekem mifala i win.
Mifala i yusum lips blong mifala olsem we mifala i wantem,
?Hu bambae i kam bos blong mifala?”+
5 Jehova i talem se: “From we ol man oli spolem olgeta we oli harem nogud,
Mo from we ol puaman oli stap pulum nogud win blong olgeta,+
Bambae mi girap blong tekem aksen,
Bambae mi sevem olgeta, mi tekemaot olgeta long han blong ol man we oli stap tritim nogud olgeta.”*
6 Ol tok blong Jehova oli klin gud,+
Oli olsem silva we oli bonem insaed long graonpot* seven taem blong mekem i klin gud.
7 O Jehova, yu bambae yu lukaot gud long olgeta.+
Bambae yu protektem olgeta wanwan olwe, blong jeneresen ya i no spolem olgeta.
8 Man nogud i stap wokbaot olbaot we i no gat wan samting i blokem hem
From we ol pikinini blong man oli stap leftemap ol kruked fasin.+