Esikel
31 Long namba 11 yia, long faswan dei blong namba 3 manis, tok blong Jehova i kamtru bakegen long mi, i se: 2 “Pikinini blong man, yu talem long Fero we i king blong Ijip mo long ol hip man blong hem, se:+
‘?Hu i hae olsem yu?
3 I gat wan man Asiria i stap, wan sida long Lebanon,
Hem i gat ol naesfala branj olsem wan smol bus we i gat sed, mo hem i longfala i go antap.
Top blong hem i stap long medel blong ol klaod.
4 Ol wota oli mekem se hem i gru i kam bigwan, mo ol springwota we oli dip oli mekem se hem i gru i hae i go antap.
Ol smol reva oli stap raonabaot long ples we oli planem sida ya long hem.
Mo ol rod blong ol wota ya oli wotarem evri tri we oli stap long open ples.
5 From samting ya, hem i kam hae i bitim ol narafala tri we oli stap long open ples.
Ol bigfala branj blong hem oli kam plante we plante, mo ol branj blong hem oli kam longfala
From we i gat plante wota long ol smol reva blong hem.
6 Olgeta pijin long skae oli wokem nes blong olgeta long ol bigfala branj blong hem,
Olgeta wael animol we oli stap long open ples, oli bonem pikinini aninit long ol branj blong hem,
Mo evri nesen we i gat plante man long hem, oli stap aninit long sed blong hem.
7 Hem i kam bigwan mo i naes we i naes, mo ol branj blong hem oli longfala,
From we ol rus blong hem oli go dip kasem plante wota.
8 I no gat wan narafala sida long garen blong God+ we i olsem sida ya.
I no gat wan junipa tri we i gat ol bigfala branj olsem hem,
Mo i no gat wan plentri we ol branj blong hem oli olsem blong sida ya.
I no gat wan narafala tri long garen blong God we i naes moa i bitim hem.
9 Mi mi mekem hem i naes we i naes, mo i gat plante lif,
Mo olgeta narafala tri long Iden, hemia garen blong tru God, oli jalus long hem.’
10 “Taswe, hemia samting we Hae Masta Jehova i talem: ‘From we hem* i kam longfala we i longfala, i leftemap top blong hem i go antap long medel blong ol klaod, mo hat blong hem i kam praod from we hem i longfala, 11 mi bambae mi putum hem long han blong strongfala rula blong ol nesen+ we bambae i tekem aksen agensem hem, mo mi bambae mi sakemaot hem from ol rabis fasin blong hem. 12 Mo ol man blong ol narafala kantri, we oli moa nogud long ol narafala nesen, bambae oli katemdaon hem, mo oli lego hem i stap antap long ol bigfala hil, nao ol lif blong hem bambae oli folfoldaon long olgeta vali, mo ol branj blong hem bambae oli brokbrok oli foldaon i stap long olgeta smol reva blong kantri ya.+ Mo olgeta man long wol bambae oli aot long sed blong hem mo oli lego hem. 13 Olgeta pijin blong skae bambae oli kam stap long stamba blong hem we i foldaon i stap, mo evri wael animol blong open ples bambae oli stap long ol branj blong hem.+ 14 Samting ya i hapen, blong ol tri we oli stap klosap long ol wota oli no gru i kam longfala we i longfala, o leftemap top blong olgeta i go antap long medel blong ol klaod, mo blong ol tri we oli stap kasem plante wota oli no kam longfala olsem olgeta ya. From we olgeta evriwan ya bambae oli ded, oli go aninit long graon, olgeta wetem ol boe blong ol man, we oli stap godaon long hol we oli digim.’*
15 “Hemia samting we Hae Masta Jehova i talem: ‘Long dei ya we hem i godaon long Gref,* bambae mi mekem ol man oli sore. Taswe bambae mi kavremap ol wota we oli dip, mo mi blokem ol smol reva blong hem, blong mekem se ol wota we oli plante oli no moa ron. Mi bambae mi mekem Lebanon i kam tudak from samting ya, mo ol tri long open ples bambae oli kam drae. 16 Taem mi mekem hem i godaon long Gref* wetem olgeta we oli stap godaon long hol we oli digim,* noes blong hem taem i foldaon bambae i mekem ol nesen oli seksek, mo olgeta tri blong Iden,+ ol tri blong Lebanon we oli jusumaot mo oli beswan, hemia olgeta tri we oli wotarem gud, bambae oli harem gud aninit long graon. 17 Olgeta oli godaon long Gref* wetem hem, mo wetem ol sapota* blong hem we oli stap long sado blong hem long medel blong ol nesen,+ oli godaon blong stap wetem ol man ya we oli ded long naef blong faet.’+
18 “‘I no gat wan tri long Iden we i longfala mo i hae olsem yu.+ Be bambae oli mekem yu yu godaon wetem ol tri blong Iden, yu godaon aninit long graon. Bambae yu ledaon long medel blong olgeta we oli no sakomsaes, we oli ded long naef blong faet. Samting ya nao bambae i hapen long Fero mo long ol hip man blong hem,’ hemia nao samting we Hae Masta Jehova i talem.”