NEHAM
1 Wan strong tok agensem Nineve.+ Buk blong vison blong Neham,* we i man Elkos:
2 Jehova i wan God we i wantem se man i wosipim hem nomo+ mo hem i stap givimbak,
Jehova i stap givimbak mo i rere blong soemaot kros blong hem.+
Jehova i stap givimbak long ol enemi blong hem,
Mo hem i stap hivimap kros from ol enemi blong hem.
3 Jehova i no save kros kwik+ mo i gat bigfala paoa,+
Bambae Jehova i no letem eni samting i blokem hem blong givim panis long stret taem.+
Rod blong hem i stap long strong win mo hariken,
Mo klaod i olsem das long leg blong hem.+
4 Hem i tok strong long solwota,+ mo i mekem i kam drae,
Mo i mekem ol reva oli no moa ron, oli drae.+
Tufala hil ya Basan mo Kamel i drae,+
Mo ol flaoa blong Lebanon oli drae.
5 Ol bigfala hil oli seksek from hem,
Mo ol smosmol hil oli melt.+
Wol bambae i stap long bigfala trabol taem i luk fes blong hem,
Mo graon tu wetem evriwan we oli stap long hem.+
6 ?Hu i save kam stanap long fored blong hem taem hem i kros?+
?Mo hu i save fesem bigfala kros blong hem gogo i finis?+
Bambae hem i kafsaedem kros blong hem olsem faea,
Mo ol bigbigfala ston bambae oli seksek from hem.
7 Jehova i gud,+ hem i wan strong ples blong haed long dei blong trabol.+
Hem i tingbaot* olgeta we oli stap go long hem blong haed.+
8 Bambae hem i yusum wota we i ron strong blong distroem ples blong hem* fulwan,
Mo tudak bambae i ronem ol enemi blong hem.
9 ?Bambae yufala i mekem wanem plan agensem Jehova?
Hem bambae i distroem evri samting.
Trabol bambae i no girap seken taem bakegen.+
10 From oli fasfas gud olsem ol ropnil,
Mo oli olsem olgeta we oli drong long bia,*
Be bambae faea i kakae olgeta olsem drae gras.
11 Wan man blong mekem plan agensem Jehova, bambae i aot long yu* i kam,
I stap givim advaes we i no givhan nating.
12 Hemia samting we Jehova i talem:
“Nating se oli kam wetem ful paoa mo oli plante we plante,
Be yet bambae mi katemdaon olgeta mo bambae oli pasawe.*
Mi mi bin mekem yu* yu harem nogud, be bambae mi no moa mekem yu harem nogud.
13 Mo naoia bambae mi brekemaot yok blong hem long nek blong yu,+
Mo bambae mi brekem jen we i fasem yu, long tu pis.
14 Jehova i givim wan oda long saed blong yu* se,
‘Nem blong yu bambae i no moa save stap longtaem moa.
Bambae mi flatemgud ol pija we man i wokem mo ol aedol* long haos* blong ol god blong yu.
Bambae mi mekem wan gref blong yu, from we yu rabis olgeta.’
15 !Yu luk! Antap long ol bigfala hil yu save luk leg blong man we i stap karem gud nius i kam,
Hemia man we i stap talemaot pis.+
O Juda, i gud yu mekem ol lafet blong yu,+ i gud yu mekem samting we yu promes blong mekem,
From man ya we i nating nomo, bambae i no moa kam pas long ples blong yu bakegen samtaem.
Bambae oli distroem hem olgeta.”
2 Man we i stap ronem ol man i go wanwan, i kam antap finis blong agensem yu.*+
Yu blokem gud ol strong ples blong haed.
Yu gad long rod.
Yu mekemrere mo yu mekem evri samting blong yu oli gat moa paoa.
2 From Jehova bambae i givimbak ol flas samting blong Jekob,
Wetem ol flas samting blong Isrel tu,
From ol man blong spolem samting oli bin spolem olgeta,+
Mo oli spolem ol niufala sut blong olgeta finis.
3 Ol sil blong ol strong man blong hem oli red,
Ol strong man blong faet blong hem oli werem ol klos we i dak red.
Long dei we hem i stap rere from faet
Ol aean long ol wo jariot blong hem oli stap saen olsem faea,
Mo ol spia we oli wokem long junipa tri, oli holem rere finis.
4 Ol wo jariot oli stap spid olbaot long ol big rod.
Oli stap ron i go antap mo i godaon long ol pablik ples.
Oli saen olsem toslaet mo oli stap saen olsem laetning.
5 Bambae hem i singaot ol ofisa blong hem i kam.
Taem oli stap ron i go, bambae oli stap stambol.
Oli ron i go from stonwol blong hem,
Mo oli stanemap ol wol.
7 Desisen i stap finis: Woman ya i kam long klia ples,
Oli karem hem i gowe, mo ol slef gel blong hem oli stap krae,
Taem oli krae oli stap kilkilim jes* blong olgeta, noes blong olgeta i olsem noes blong sotleg.
8 Long olgeta dei blong hem, Nineve+ i olsem wan pul blong ol wota,
Be naoia oli stap ronwe.
“!Yufala i stanap! !Yufala i stanap!”
Be i no gat wan i tanraon i kambak.+
9 !Karem ol silva, karem ol gol!
Ol gudgudfala samting ya oli no save finis.
Hem i fulap long olgeta defdefren kaen sas samting.
10 !Taon ya i emti, i stap nating nomo, mo i nogud olgeta!+
Oli fraet bitim mak, ni blong olgeta i ben, mo hips blong olgeta i stap seksek,
Fes blong olgeta evriwan i kam nogud.
11 ?Wehem hom blong ol laeon,+ ples ya we ol yang laeon oli* stap kakae long hem,
Mo ples ya we laeon i stap long hem i stap lidim pikinini blong hem i goaot,
We i no gat wan man i save mekem olgeta oli fraet?
12 Laeon i kilim naf animol blong givim long ol pikinini blong hem
Mo i jokem win blong ol animol blong givim long ol woman laeon.
Hem i mekem se hom blong hem i fulap oltaem long mit,
Yes hom blong hem i fulap long ol animol we hem i kilim olgeta.
13 Jehova komanda blong ol ami i talem se: “!Yu luk! Mi mi agensem yu.”+
“Bambae mi bonem ol wo jariot blong hem, we smok bambae i kavremap gud,+
Mo naef blong faet bambae i kilim ol yang laeon blong yu.*
Bambae mi karemaot kakae blong yu long wol,
Mo ol man bambae oli no moa harem voes blong ol mesenja blong yu bakegen.”+
3 !Sore tumas long taon ya we i taon blong mekem blad i ron!
Hem i fulap gud long fasin blong giaman mo fasin blong stil.
!Neva hem i sot long kakae!
2 I gat noes blong wip mo noes blong ol wil blong jariot,
Ol hos we oli stap ron i go mo noes blong ol jariot.
3 Ol man we oli stap raed long hos, naef blong faet we i stap saen, mo spia we i saen gud,
Yes, bigfala hip blong ol man we oli ded long faet mo ol hip blong ol dedbodi,
Man i no save kaontem ol dedbodi ya evriwan.
Oli stap stambol long ol dedbodi ya.
4 Samting ya i kamaot from ol fasin blong mekem prostitut, we prostitut ya i stap mekem,
Hem i naes mo i gat naesfala fasin, hem i misis blong ol wok blong kleva,
Hem i stap yusum fasin blong mekem prostitut, olsem trap blong kasem ol nesen, mo i yusum wok blong kleva blong kasem ol famle.
5 Jehova komanda blong ol ami, i talem se: “!Yu luk! Mi mi agensem yu,*+
Bambae mi leftemap sket blong yu i go kavremap fes blong yu,
Bambae mi mekem ol nesen oli luk we yu neked,
Mo ol kingdom bambae oli luk we yu sem.
6 Mo bambae mi sakem doti long yu
Mo mi mekem se yu rabis olgeta,
Bambae mi mekem se ol man oli stap lukluk yu.+
7 Evriwan we oli luk yu bambae oli ronwe long yu+ mo oli se,
‘!Oli distroem Nineve finis!
?Hu bambae i go serem sore wetem hem?’
?Weples bambae mi faenem ol man blong oli kam mekem yu harem gud?
8 ?Yu yu gud moa long No-amon,*+ we i stap klosap long ol kanal blong Nael Reva?+
Ol wota oli raonemgud hem,
Solwota hem i sas samting blong hem, mo solwota hem i stonwol blong hem.
9 Itiopia hem i stamba blong bigfala paoa blong hem, mo Ijip tu.
Put+ mo ol man Libia oli ol helpa blong yu.+
10 Be hem tu i go stap long narafala kantri,
Oli tekem hem i go kalabus.+
Ol pikinini blong hem tu ol man oli kilim nogud olgeta long ol kona blong rod.
Oli sakem ol spesel ston from ol bigman blong hem,
Mo ol haeman blong hem, ol man oli fasem olgeta long ol jen.
11 Bambae yu drong tu,+
Bambae yu traem go haed.
Bambae yu lukaot wan ples blong haed long ol enemi.
12 Ol strong ples blong haed blong yu oli olsem ol figtri we ol fasfrut blong olgeta oli raep finis,
Mo sipos oli seksekem olgeta, bambae oli foldaon i go long maot blong ol man we oli wantem kakae.
13 !Yu luk! Ol ami blong yu oli olsem ol woman long medel blong yu.
Ol get blong kantri blong yu bambae oli open bigwan rere from ol enemi blong yu.
Faea bambae i bonem ol aean blong ol get blong yu.
14 !Yu kasem wota i stap rere bifo we oli kam raonem yumi!+
Yu mekem ol strong ples blong haed blong yu oli kam strong moa.
Yu godaon long ples blong sofmad mo yu stanstanap long klei,
Yu holem mol blong brikis.
15 Be faea bambae i bonem yu long ples ya tu.
Wan naef blong faet bambae i katemdaon yu.+
Bambae i flatemgud yu olsem ol yang lokis oli mekem.+
!Yu mas mekem se yu kam plante olsem ol yang lokis!
!Yes, yu mas mekem se yu kam plante olsem ol lokis!
16 Yu yu mekem ol bisnesman blong yu oli kam plante moa bitim ol sta long heven.
Yang lokis i kamaot long skin blong hem mo i flae i gowe.
17 Ol gad blong yu oli olsem lokis,
Mo ol ofisa blong yu oli olsem bigfala grup blong lokis.
Oli kamp long wan ston fenis long wan dei we i kolkol,
Be taem san i saen, oli flae i gowe,
Mo i no gat man i save weples oli stap.
18 O King blong Asiria, ol man blong yu blong lukaot long sipsip oli drong long slip,
Ol haeman blong yu oli stap long ol haos blong olgeta.
Ol man blong yu oli go wanwan olbaot long ol bigfala hil,
Mo i no gat man i go blong tekem olgeta i kam wanples.+
19 I no gat wan samting i save mekem yu harem gud bakegen afta long trabol ya.
Soa blong yu i no save kam gud,
Olgeta evriwan we oli harem ripot long saed blong yu, bambae oli klapem han blong olgeta,+
From we bifo, olgeta evriwan oli stap safa from ol raf fasin we yu stap mekem oltaem.”+
Hemia i minim “Man Blong Mekem Man i Harem Gud.”
NT: “i stap lukaot gud long.” PT: “i save.”
Hemia Nineve.
NT: “bia blong wit.”
Hemia Nineve.
MNT: “mo bambae hem i pastru.”
Hemia “Juda.”
Hemia Asiria.
NT: “aedol we oli wokem long silva, gol, o kopa.”
NT: “tempol.”
Hemia Nineve.
NT: “foldaon.”
NT: “hat.”
NT: “we ol man laeon we oli yang mo oli gat plante hea long nek blong olgeta oli.”
NT: “ol man laeon blong yu we oli yang mo oli gat plante hea long nek blong olgeta.”
Hemia i minim Nineve.
Hemia Tebes.