?Mi Save Mekem Wanem Blong Ol Fren Blong Mi Oli No Pulum Mi?
Wan leta we i kam long wan polisman long Jikago, U.S.A., i soemaot olsem wanem ansa blong kwestin ya i impoten. Hem i raetem se:
“Long Janewari 15, 1990, mi stap traem blong faenemaot sam samting long wan presin man we i gat 18 yia. Hem i bin ronwe i go haed long Misisipi mo oli bin tekem hem i kambak bakegen long Jikago. Sam samting we mi mas tekemaot long ol presin man hemia olting blong olgeta. Man ya i gat wan buk, Questions Young People Ask—Answers That Work.
“Mi askem hem se, ‘?Yu bin ridim buk ya?’
“Hem i ansa se, ‘Yes. Taem mi stap haed long Misisipi, mi bin wok long wan garen, mo tu Wetnes blong Jeova oli givim buk ya long mi.’ Nao hem i stat blong krae, hem i krae we i no save stop. Taem hem i krae hem i stap talem se: ‘Mi bin ridim buk ya plante taem finis, mo japta we mi ridim plante taem bakegen hemia: “?Mi Save Mekem Wanem Blong Ol Fren Blong Mi Oli No Pulum Mi?”’ Hem i gohed i se: ‘Sipos mi bin ridim samting ya tri no fo yia bifo finis, bambae mi no save stap long ples ya tede.’
“Nao oli tekem presin man ya i goaot, mi ridim ripot blong polisman mo ol tok blong presin man ya. Insaed long ripot blong hem, presin man ya i talem se: ‘Lida blong rabis gang blong mifala i talem long mi blong godaon long rod mo sutum wan memba blong narafala gang we i enemi blong mifala, hem i stap salem drag ya koken long eria blong mifala. Mi mekem olsem we lida blong mifala i talem long mi. Mi mi fraet se sipos mi no mekem, ol narafala memba blong gang blong mifala bambae oli ting se mi mi no gud inaf blong joenem olgeta. Mi wantem se oli glad long mi.’
“Presin man ya we i gat 18 yia oli jajem hem from fasin blong kilim man i ded, mo sipos kot i agri se hem i rong, bambae oli kilim hem i ded, hemia from we hem i mekem wan samting we ol fren blong hem oli pulum hem blong mekem.”
Yumi save dipen long Baebol blong i lidim yumi mo i givim ol waes advaes long yumi blong yumi winim plante trabol tede. Sipos yu wantem save moa no yu wantem wan fri Baebol stadi long haos blong yu, plis raet long, Association “Les Témoins de Jéhovah”, B.P. 787, Nouméa, Nouvelle-Calédonie, no long adres we i kolosap long yu. Lukluk pej 5.