Ol Tija Oli Wantem Olgeta

WAN studen blong Nedelan we i gat 17 yia i raetem olsem se: “Fren blong mi long skul i askem plante kwestin long saed blong olsem wanem ol skul oli defren. Mi mi tekem jans ya blong givim buk ya Mankind’s Search for God long hem. Taem klas blong mifala i mas raetem wan store long samting we mifala nomo i wantem, fren blong mi i jusum blong mekem store long saed blong ol skul mekem se hem i save yusum nyufala buk blong hem.

Taem mifala i soemaot weples mifala i kasem ol save we mifala i raetem long store, tija blong mifala i tekem buk ya. Biaen hem i askem se weples mifala i kasem ‘nambawan buk ya.’ Fren blong mi i talem se mi nao mi givim buk ya long hem.

“Stret long taem ya tija blong mi i askem se mi save karem fo kopi blong hem mo ol fren blong hem. Nekis dei mi givim ol buk ya long hem, mo stret long taem ya hem i soemaot olgeta long ol narafala tija. Smoltaem biaen, hem i talem long mi se: ‘Komiti blong skul i givim raet long mi blong kasem 35 buk olsem.’”

Plante man tede oli luksave from wanem i gud blong stadi long ol skul. Plante man oli save skul blong ol papa mama blong olgeta nomo mo plante taem oli save smol nomo long saed blong skul ya tu. ?Be olsem wanem, skul blong yu hemia nao skul we yu yu bon long hem? Sipos yu skelem skul blong yu wetem ol skul blong ol narafala man, bambae yu save mekem wan gudfala disisin we i waes.

Sipos yu wantem save moa no yu wantem wan man i kam mekem wan fri Baebol stadi wetem yu, plis yu save raet i go long Association “Les Témoins de Jéhovah,” B.P. 787, Nouméa, Nouvelle-Calédonie.