Ol Laet We Oli Narakaen—?Oli Kam Weples?

OL LAET blong not mo saot, no ‘auroras,’ oli bin stap olsem wan stampa samting we ol man long not mo saot pol oli wantem kasem save long hem. I gat bilif i stap naoia se insaed long wol i gat ol laen blong ol aean we oli hot tumas we oli stap kam antap mo foldaon mo taem wol i stap goraon hem i stap twistim olgeta. Samting ya i mekem paoa blong lektrik i kam antap. Ale sam haf blong skae we oli laenap wetem wol we i lei mo i stap goraon kwiktaem, oli kam fulap long lektrik. Hot blong san we i kasem wol, i mekem wan samting long skae we yumi save luk, olsem sam haf blong skae we oli fulap long lektrik. Be ol laet oli save kam bigwan moa taem i gat moa hot blong san i kamtru long wol from we paoa blong san i kam antap moa. Sam hot blong san we oli kamtru long wol oli stap raonabaot long wol from we graon i pulum olgeta oli stap kolosap. Nao samting ya i mekem ol smosmol samting we oli stap long win raonabaot long wol (atom) oli faerap, mekem se ol laet mo naes kala we yumi save luk oli kamaot. Ol kala ya oli save kamaot taem paoa blong san i kasem ol atom insaed long tufala gas ya ‘oksijen’ mo ‘naetrojin,’ nao i mekem ol laet we yumi save luk we oli muvmuf olsem solwora we i red, grin, mo pink. Plante long ol ‘auroras,’ kala blong olgeta i grin, we sam haf blong hem i red mo pink. Long ol ples long not blong wol, oli kolem ol laet ya se ‘aurora borealis’ (Latin, taem san i girap long not), mo long ol ples long saot blong wol, oli kolem ‘aurora australis’ (taem san i girap long saot).

Man blong raetem Sam blong bifo i talem se, “Skae i stap talemaot bigfala paoa blong God.” (Ol Sam 19:1) Sipos yu wantem kasem moa save long saed blong Man we i Mekem olgeta samting we oli stap long skae, plis yu save singaot long ol Wetnes blong Jeova we oli stap kolosap long ples blong yu, no raet long ol man we oli wokem magasin ya.—Luk pej 5.

[Foto Credit Line blong pija long pej 32]

NASA photo