Samting We i Pulum Hem Blong Prea

Karen, wan Wetnes blong Jeova long Nyu Yok Stet, i talem se hem i sanem buk ya Listening to the Great Teacher i go long mama blong hem. Karen i raetem se: “Mi mi givim buk ya long Mama, blong hem i ridim long naet long Jamie, gel blong sista blong mi, we hem i gat 9 yia.” Karen i eksplenem se: “Mi raetem wan leta i go long Jamie mo mi talem long hem se hem i mas ridim buk ya evri naet long haos blong abu, olsemia nao bambae hem i stap tingbaot ol gudfala samting bifo we hem i slip.”

Biaen, mama blong Karen, we hem i no wan Wetnes blong Jeova, i talem long Karen se Jamie i bin go ledaon long bed blong hem nao i stat blong ridim buk ya. Long nekis moning, Jamie i talem se hem i bin prea from smol brata blong hem (we dokta i mas katem hem) bifo we hem i slip. Samting ya i tajem hat blong mama blong Karen from we hem i ting se neva Jamie i bin prea bifo.

Karen i raetem se: “Buk ya i gat bigfala paoa sipos hem i save pulum wan pikinini we i gat 9 yia blong prea, taem hem i ridim wan smol haf blong hem nomo. Samting ya i mekem mi mi luksave moa se ol buk olsem oli gat bigfala paoa. Ating buk ya i pulum tingting blong mama blong mi tu, from we hem i talem se hem i luk we buk ya i askem plante kwestin mo i soemaot klia ol gudfala fasin, i no jes talem ol store nomo.”

Sipos yu yu laekem blong kasem wan kopi blong buk ya Listening to the Great Teacher no yu wantem we wan man i mekem wan fri Baebol stadi wetem yu, plis raet i go long adres we i stret long ples blong yu we i stap long pej 5.