?Oli No Man Blong Wol Ya?

MAN BLONG WEKAP! LONG JEMANI I RAETEM STORE YA

“OLSEM we mi mi no man blong wol ya, olgeta ya tu oli no man blong wol ya.” (Jon 17:16) Long ol toktok ya, Jisas i soemaot klia se ol man blong hem oli no joen nating long ol bisnes blong politik. ?Ol man we oli talem se oli Kristin tede, oli folem stret toktok ya blong Jisas?

Tingbaot ol toktok we oli kamaot biaen. Hemia toktok blong sam nyuspepa, long saed blong fasin blong Krisendom blong joen long bisnes blong kantri ya we bifo oli kolem Demokratik Ripablik blong Jemani (DRJ). Bifo, hem i bin stap aninit long rul blong wan Komunis gavman, go kasem taem we hem i seraot long 1990.

• “Luteran Jyos long Demokratik Ripablik blong Jemani, hem i bin haremgud blong wan sot taem, from we ol man oli leftemap hem olsem mama blong bigfala jenis ya we i kamtru long fasin we i no gat faet. Be naoia, i luk olsem we fasin ya blong ol man blong tinghae long hem, i stap godaon kwiktaem. Long tingting blong plante man, i luk olsem we jyos ya i bin sapotem moa gavman ya we i rul strong, mo i bin stap olsem stampa ples blong ol wok blong Stasi (Stet Sekuriti Sevis).”—Die Zeit, Novemba 1991.

• “Plante Luteran Jyos long ol defren ples . . . oli bin soemaot bigfala sapraes long fasin blong ol man we oli mekem wok blong jyos mo ol man we oli stap go long jyos, taem oli joen wetem Stasi.”—Evangelische Kommentare, Janewari 1991.

• “Sam man oli stap komplen long ol lida blong [Luteran] Jyos se ol pasta oli no moa stap lukaot long ol man long skul blong olgeta, olsem oli mekem bifo, from we naoia oli bisi tumas long ol bisnes blong politik.”—Süddeutsche Zeitung, Febuwari 1990.

• “Weizsäcker [wan presiden blong Federal Ripablik blong Jemani bifo] i talem se, oltaem [Luteran] Jyos i bin halpem bigwan tufala kantri blong Jemani, long saed blong politik.”—Wetterauer Zeitung, Febuwari 1992.

Be i no Luteran Jyos nomo we i stap joen long politik. The European i mekem ripot ya se: “Sam man blong Stasi oli wok wetem kolosap evri [Protestan] jyos grup.” Manfred Stolpe, we The European i tokbaot hem olsem “man we protestan jyos i yusum hem oltaem blong toktok wetem komunis gavman,” i talem long saed blong wok blong hem se: “Mi save sekhan wetem Setan, sipos long rod ya mi save mekem wok blong mifala i go moa.”

Guardian blong London i mekem ripot long saed blong gudfala fasin fren blong ol lida blong jyos long Itali mo Mafia. Hem i talem se: “Jyos mo Cosa Nostra (Mafia blong Itali) oli laef mo wok tugeta long pis blong longtaem nao, mekem se plante taem ol man oli blemem jyos se hem i joen long ol nogud fasin blong Mafia.”

Toronto Star i raetem wan store long saed blong fasin blong sam pasta blong Otodoks Jyos long Rasia, blong wok kolosap wetem KGB bifo (Komiti blong Stet Sekuriti). Ripot ya i talem se: “Ol fasin haed we oli kam long klia ples, long saed blong fasin we jyos i bin wok wetem komunis gavman, oli mekem wan bigfala sem. . . . Sam pepa blong ol KGB . . . oli soemaot se ol bigman blong jyos ya oli brekem ol rul we oli save se oli stret, mo tu, oli rere blong go agens long ol lida blong jyos long ol narafala kantri.”

Ol jyos blong Krisendom oli gohed blong joen long politik, be ol tru Kristin oli folemgud ol tok blong Jisas blong no kam man blong wol ya.