“Karem Fote i Kam. Bambae Mi Seremaot Olgeta”

Wolfgang mo waef blong hem Waltraut, tufala i stap mekem wok blong tijim ol man long saed blong Baebol long saot blong Jemani. Plante taem, tufala i traem blong givim sam Wekap! long wan man. Be oltaem hem i no wantem, mo hem i talem se: “Mi mi gat plante samting finis blong ridim.”

Be, Wolfgang mo waef blong hem, tufala i ting se maet man ya i glad blong ridim wan haf blong Wekap! blong Novemba 22, 1996 (Engglis no Franis), we nem blong hem se: “Sakemaot Ol Rong Tingting Long Saed Blong Ol Wetnes Blong Jeova.” Haf ya i storeyan long wan tok we i kamaot long Rotari Klab blong Kalifonia, long Yunaeted Stet.

Taem Wolfgang i openem Wekap! mo i soem haf ya long man ya, wantaem nomo man ya i stat ridim. Nao hem i askem sipos i save holem Wekap! ya. Hem i talem se: “Bambae mi ridim tunaet, taem i no gat noes mo mi stap kwaet.”

Tri dei biaen, Wolfgang mo waef blong hem, tufala i mitim man ya bakegen. ?Man ya i talem wanem? Hem i talem se: “Store ya i gud tumas.”

?From wanem hem i laekem store ya? I luk olsem se bifo, hem i gat sam rong tingting tu long saed blong ol Wetnes blong Jeova. Be naoia, hem i sua se ol fren blong hem long Rotari Klab bambae oli glad blong ridim haf ya. Hem i askem se: “?Yutufala i save karem sam moa Wekap! olsemia i kam long mi?”

Waltraut i askem se: “?Yu yu wantem hamas?”

“Karem fote i kam. Bambae mi seremaot olgeta.”

Sipos yu wantem kasem Wekap! no yu wantem wan man i kam luk yu blong mekem Baebol stadi wetem yu we yu no pem, plis raet long Association “Les Témoins de Jéhovah,” B.P. 1741, Mont Dore 98810, Nouvelle-Calédonie.