Ol Man Blong Ridim Wekap! Oli Talem
En Blong Fasin Pua Tangkiu tumas from haf ya “En Blong Fasin Pua i Klosap,” we i kamaot long Wekap! blong Oktoba-Desemba, 1998. Haf ya i soemaot ol samting olsem we oli rili stap, mo hem i mekem mi mi luksave se mi stap komplen blong nating nomo. Mi mi no gat wok mo mi no gat plante mane, ale, mi sore long mi wan se mi pua bitim mak. !Be, nogat! Haf ya i soem klia se i gat sam we oli pua tumas, i bitim mi. Mi mas gat tangkiu from ol samting we mi gat finis—kakae, klos, gudfala helt, mo antap moa, save long saed blong Jeova. Mi wantem tumas blong luk taem ya we fasin pua bambae i lus olgeta. Mi mekem disisen naoia blong gohed blong putum Kingdom blong Jeova fastaem, mo bambae mi no moa komplen.
C. W., Nyusilan
Mi Mas Jusum Bitwin Tu Papa Mi lanem trutok blong God wetem wan fren we i skul wetem mi taem mi gat 14 yia. Papa mama blong mi, tufala i no agri long stadi blong mi long Baebol, be papa nao i agensem mi moa. Laki se hem i neva sakemaot mi long haos olsem i bin talem. Mi no lego stadi blong mi, mo faef yia biaen, mi tekem baptaes. Olsem brata long stori blong Wekap! ya (Oktoba-Desemba, 1998), mi hop se wan dei papa mama blong mi, tufala i serem hop blong mi tu, blong laef long niufala wol blong Jeova, we stret fasin nomo bambae i stap long hem.
W. S. L., Brasil
Mi stat krae taem mi ridim stori ya. Papa blong mi i wan we i agensem strong ol bilif blong mi. Mifala i save storeyan tugeta, be sipos mifala i stat tokbaot Baebol no ol Witnes blong Jeova, mi fraet we bambae hem i kros bitim mak. Hem i kilim mi plante taem. Be stori ya i leftemap tingting blong mi blong stanap strong, nating se mi mas fesem traem ya.
I. H., Jemani
Stori ya i kasem hat blong mi. Mi gruap long wan famle we samfala nomo oli folem trutok. Taswe, mi luksave trabol we yangfala man ya i gat long filing blong hem taem hem i mas jusum bitwin tu papa.
A. M., Itali
Wajem Ol Pijin Mi wan gel we i gat 7 yia. Mi laekem tumas haf ya “Wajem Ol Pijin—?Wan Nambawan Samting We Eniman i Intres Blong Mekem?” (Oktoba-Desemba, 1998) Ol foto mo toktok blong haf ya oli halpem mi blong luk se Jeova i wokem wol long nambawan fasin. Anamol we mi mi laekem tumas hemia pijin blong Afrika we oli kolem black-crowned crane—mi ting se hem i luk fani. Tangkiu tumas long ol haf ya we yufala i raetem.
F. K., Itali
Sam Advaes Blong Ol Man We Oli Go Long Narafala Kantri Yufala i mestem wan advaes long bokis ya “Sam Advaes Blong Ol Man We Oli Go Long Narafala Kantri,” long haf ya “Denggi—Wan Fiva We Wan Moskito i Givim.” (Oktoba-Desemba, 1998). Advaes ya hemia se, taem man i slip long naet, hem i mas yusum wan moskito net we oli putum meresin long hem finis blong kilim moskito.
I. H., Engglan
Mifala i tangkiu from advaes ya. Hemia wan gudfala rod blong traem blokem malaria. (Lukluk Wekap! blong Oktoba-Desemba 1997, pej 31.) Nating se i olsem, U.S. Centers for Disease Control i talem se, moskito ya we i karem denggi, hem i “laekem moa blong stikim ol man long dei taem.” Moskito ya i save stikim man “sam aoa afta we i brok delaet, mo i go kasem let long aftenun, sam aoa bifo we tudak i kam.” Taswe, fasin blong yusum wan moskito net long naet, ating bambae i no naf blong blokem fiva ya denggi.—ED.
?Fol Blong Setan? Mi gat 17 yia, mo i no longtaem we mi stat ridim ol Wekap! !Naoia mi laekem tumas blong ridim ol magasin ya! I gat sam gudfala advaes long haf ya: “Baebol i Talem Wanem: ?Ol Sin Blong Yumi Oli Fol Blong Setan Nomo?” (Oktoba-Desemba 1998) Bifo we mi ridim haf ya, mi ting se mi save putum fol long Setan taem mi mi mekem sin. Be, naoia tingting blong mi i jenis long saed ya. Mi wantem talem se, magasin blong yufala i nambawan. I gud evri man oli ridim hem. !Plis, putum nem blong mi long lis blong ol man we oli stap kasem magasin ya evri manis!
M. M., Yunaeted Stet