‘!Oli Rili Mekem Man i Haremgud!’

I NO longtaem i pas, maneja blong wan hotel klosap long wan intenasnal epot long Japan i visitim hed ofis blong ol Witnes blong Jeova long taon ya Ebina. I luk olsem we hem i glad tumas. ?From wanem?

Long 1998, bitim 200 Witnes oli bin slip long hotel blong hem. Oli stap go long ol intenasnal asembli long Afrika, Ostrelya, Koria, mo Not Amerika. Nao long en blong yia ya, ol wokman long hotel oli mekem wan miting blong tokbaot wok blong olgeta long ful yia, mo oli talemaot se oli glad moa blong lukaot long ol Witnes ya i bitim ol narafala 30,000 man we oli bin kam slip long hotel ya long yia we i pas.

From samting ya, maneja i wokbaot i go long Ebina blong talemaot tangkiu long ol Witnes. Hem i se: ‘Taem oli stap long hotel, oli soem respek. Mo taem oli aot, oli livim rum blong olgeta i klin mo i stret. Plante taem oli talem tangkiu long mifala. Mo tu, oli talem sam tok blong Baebol we i leftemap tingting blong mifala. !Oli rili mekem man i haremgud!’

Maneja ya i gohed se: ‘Plante man we oli stap wari tumas, oli kam stap long hotel blong mifala. Mo mifala i stap lukaot sam gudfala save blong givhan long olgeta. Mifala i wantem se oli kasem tijing blong Baebol from we hemia i gat paoa blong mekem laef blong olgeta i kamgud moa.’

Nao hem i askem 80 kopi blong sam buk blong ol Witnes blong Jeova, blong putum long ol wanwan rum blong hotel. Wan long ol buk ya, hemia Spesel Rod Blong Mekem Famle i Hapi we i gat 192 pej blong hem. Sipos yu yu wantem wan buk olsem, plis fulumap smol bokis we i stap long pej ya mo sanem i kam long wan long ol adres long pej 5, we i stret long ples blong yu.

□ Sanem buk ya Spesel Rod Blong Mekem Famle i Hapi.

□ Plis kam luk mi from wan Baebol stadi we i fri nomo.