Ol Flaoa Oli Sevem Laef Blong Olgeta

LONG Yurop, long ol laswan manis blong Seken Wolwo, ol Nasi oli blokem ol sip blong oli no moa save karem kakae i kam long ol bigfala taon long wes blong Netalan. Hemia i mekem bigfala trabol i kamaot, olsem plante man we oli laef long taem ya oli save talem.

Bodi blong yumi wanwan i nidim we yumi kakae naf blong wokem 1,600 kasem 2,800 kalori evri dei. Be long Eprel 1945, samfala we oli laef long ol taon olsem Amsterdam, Delft, The Hague, Leiden, Rotterdam, mo Utrecht, oli stap kasem 500 no 600 kalori nomo evri dei. From samting ya, long koltaem blong 1944 mo 1945, klosap 10,000 man oli ded from hanggri.

Susan Monkman, we i laef tru long hadtaem ya, i talem se famle blong hem i hanggri tumas, mekem se oli kakae stamba blong wan flaoa we nem blong hem ‘tulip.’ Hem i talem se: “Stamba blong flaoa ya i gat ol sap kona long hem we oli save katem maot blong man. Mifala i boelem blong longtaem, be i no save kam sofsof. Nating se i olsem, mifala i glad long hem, ale mifala i kakae sloslou mo lukaotgud long ol sap kona. Blong plante dei biaen, trot blong mifala i soa.” Blong mekem se kakae ya i no skrasem trot blong olgeta tumas, oli meksemap stamba blong flaoa ya wetem sam karot mo bitrut, sipos oli gat.

Wan smol pis kakae ya (100 gram) i gat 148 kalori long hem, 3 gram protin, 0.2 gram gris, mo 32 gram kabahaedret we i givim paoa long bodi. Ale, stamba blong ol flaoa ya i sevem laef blong plante man Netalan, nating se i no tesgud.

Olgeta we oli pastru long hadtaem ya, oli no save fogetem ol nogud fasin we sam man oli mekem blong spolem ol narafala. Samting ya i soemaot se yumi nidim tumas we promes blong Baebol i kamtru se: “God i promes finis blong putum niufala skae mo niufala wol, we stret fasin nomo bambae i stap long hem. Mo yumi stap wet long ol samting ya blong oli kamtru.”—2 Pita 3:13.

[Foto Credit Line blong pija long pej 16]

Internationaal Bloembollen Centrum, Holland