“!Mi Ting Se Mi Stap Drim!”
Woman ya Lourdes i stap stanap long windo blong rum blong hem, i stap lukluk i go afsaed long ol haos long taon. Han blong hem i kavremap maot blong hem we i stap seksek. Hem i wan woman Latin Amerika. Man blong hem, Alfredo, i stap kilim hem blong bitim 20 yia. Be biaen Alfredo i jenisim fasin blong hem. Nating se i olsem, i had yet blong Lourdes i tokbaot ol kil we hem i bin kasem long bodi mo filing blong hem long ol yia we oli pas.
Voes blong Lourdes i smol nomo, hem i se: “Trabol ya i stat tu wik nomo afta we mitufala i mared. Wan taem hem i kilimaot tu tut blong mi. Wan narafala taem, mi benem hed blong mi kwiktaem, ale hem i faetem wan kabod. Be ol nogud tok we hem i sakem, hemia i moa nogud, hem i spolem gud filing blong mi. Hem i talem se mi mi ‘olsem doti, we i gud blong nating nomo,’ mo hem i mekem olsem we mi mi no gat hed nating. Mi bin wantem blong ronwe. Be mi gat tri pikinini. ?Olsem wanem mi save ronwe?”
Wetem lav, Alfredo i tajem solda blong Lourdes. Hem i se: “Mi mi wan bigman long wok blong mi. Taem ol polis oli kam givim faen long mi mo wan oda se mi neva mas kilim, faetem, no spolem woman blong mi bakegen, mi harem mi sem. Mi traem blong jenisim fasin blong mi, be i no longtaem, mi stap kilim woman blong mi bakegen.”
?Wanem samting i hapen blong mekem hem i jenis? Lourdes i slakem bodi blong hem, ale, hem i talem se: “I gat wan woman i stap wok long stoa long kona, hem i wan Witnes blong Jeova. Wan dei hem i talem long mi se hem i glad blong givhan long mi blong kasem save long Baebol. Ale, mi mi lanem se Jeova God i stap tinghae long ol woman. Mi stat blong go long ol miting blong ol Witnes blong Jeova, nating se Alfredo i kros tumas. Hemia i wan niufala samting long mi blong spenem taem wetem ol fren long Haos Kingdom. Mi sapraes blong faenemaot se mi mi naf blong gat ol prapa bilif blong mi, mo blong no fraet blong talemaot, mo mi mi naf tu blong tijim ol narafala. Mi luksave se mi mi sas long ae blong God. Samting ya i givim strong tingting long mi.”
“Evri Sande Alfredo i stap go long Lames, mo hem i stap agensem mi from we mi stap joen wetem ol Witnes blong Jeova. Bambae mi neva fogetem samting we i hapen blong jenisim tingting blong hem. Wan dei, mi lukluk stret long fes blong hem mo mi talem wetem strong tingting be long voes we i kwaet nomo, se: ‘Alfredo, tingting blong yu i defren long tingting blong mi.’ !Mo hem i no kilim mi! Smoltaem biaen mi mi tekem baptaes. Hemia faef yia finis ya. Stat long taem ya kasem naoia, hem i neva kilim mi bakegen.”
Alfredo i jenisim plante moa bigfala samting tu. Hem wan i talem se: “Samwe tri yia afta we Lourdes i tekem baptaes, wan man we mi wok wetem hem i singaot mi i go long haos blong hem. Man ya i wan Witnes blong Jeova. Hem i eksplenem plante samting long mi we oli stap long Baebol. Ol samting ya oli pulum intres blong mi. Hem i stat mekem Baebol stadi long mi, be mi no talem long woman blong mi. Smoltaem biaen, mi joen wetem Lourdes blong go long ol miting. Long ples ya, mi harem plante gudfala toktok long saed blong famle laef. Taem mi stap lesin long ol toktok ya, mi harem mi sem.”
Alfredo i sapraes blong luk we, ol man tu oli joen wetem ol narafala long kongregesen blong oli brum afta long miting. Taem hem i go long haos blong olgeta, hem i luk we ol man oli givhan long woman blong olgeta blong wasem ol plet. Ol samting ya i soemaot long Alfredo ol smosmol wok we oli joen wetem trufala lav.
Smoltaem biaen, Alfredo i tekem baptaes. Naoia hem wetem woman blong hem tufala i stap mekem wok blong talemaot gud nius fultaem. Lourdes i talem se: “Plante taem, hem i givhan long mi blong klinim tebol afta we mifala i kakae, mo blong stretem blangket long ol bed. Taem hem i laekem kakae we mi kukum, hem i talem ol gudfala toktok long mi. Mo hem i letem mi mi jusum sam samting, olsem miusik we mi wantem lesin long hem no samting we mifala i pem blong haos. !Bifo Alfredo i neva letem mi mi mekem ol samting ya! I no longtaem i pas, hem i karem sam naes flaoa oli kam, i givim long mi. Hemia i faswan taem we hem i mekem samting ya. !Sam samtaem mi ting se mi stap drim nomo!”
[Tok blong pija long pej 10]
“Mi luksave se mi mi sas long ae blong God. Samting ya i givim strong tingting long mi”
[Tok blong pija long pej 10]
Hem i luk we ol man oli givhan long woman blong olgeta blong wasem ol plet
[Tok blong pija long pej 10]
Alfredo i sapraes blong luk we, ol man tu oli joen wetem ol narafala long kongregesen blong oli brum afta long miting
[Tok blong pija long pej 10]
“I no longtaem i pas, hem i karem sam naes flaoa oli kam, i givim long mi. Hemia i faswan taem we hem i mekem samting ya”