Ol Man Blong Ridim Wekap! Oli Talem

Dring i Wan Trap​—?Yu Yu Fas Long Hem? (Oktoba-Disemba 2005) Plante taem mi luk ol leta blong ol man blong ridim Wekap! we oli talem se: “Haf ya i kam long stret taem we mi mi nidim.” Neva mi ting se bambae mi gat semfala filing olsem olgeta ya. Be biaen, taem mi ridim magasin ya, hemia nao filing blong mi tu. Longtaem finis, tingting blong mi i trabol from fasin ya we evri dei mi stap dring alkol, nating se mi no drong. Nao mi kasem magasin ya. Afta we mi ridim ol denja we oli save kamaot taem man i dipen tumas long alkol, mi luksave se mi mas sakemaot fasin ya.

K. W., Jemani

Wekap! ya i tokbaot Hilario we i dring blong 30 yia, mo plante taem hem i “foldaon bakegen long dring.” Hilario i talem se oltaem olgeta long kongregesen ‘oli stap blong leftemap tingting blong hem.’ ?Be from wanem ol elda oli no stretem hem no putumaot hem long Kristin kongregesen?

R. L., Yunaeted Stet

“Wekap!” i ansa: Sot stori blong Hilario i no talem stret taem we Hilario i tekem baptaes, long ol 30 yia ya we hem i stap traehad blong lego dring. Mo tu, stori ya i no talem sipos ol elda blong kongregesen oli bin stretem hem long ol yia ya no nogat. Stori i talem nomo se Hilario i kasem sam ‘advaes blong Baebol long stret taem we hem i nidim.’ Maet ol advaes ya i kamaot long wan kot komiti we ol elda oli mekem blong stretem hem. Samtaem, man we i stap traehad blong lego dring, i save foldaon bakegen mo bakegen long trap ya, sem mak olsem Hilario. Blong luk olsem wanem ol elda oli stretem wan bisnes olsem wetem wan man we i baptaes finis, plis lukluk long “Wajtaoa” (Franis/Inglis), Mei 1, 1983, pej 8-11.

Ol Yangfala Oli Askem . . . ?From Wanem Mi Mi Laekem Olgeta We Oli No Gat Gudfala Fasin? (Oktoba-Disemba, 2005) Haf ya i givhan long mi blong luk se mi no save gat tu tingting long saed blong ol mak we mi putum. Hem i halpem mi blong mi mekem tingting blong mi i strong blong seraot long ol nogud fren. Naoia mi frengud wetem plante yangfala mo olfala insaed long kongregesen. Mi harem se olgeta ya we oli lavem Jeova oli lavem mi tu, mo oli stap leftemap tingting blong mi blong gohed long rod ya we i go kasem laef.

M. D., Meksiko

Baebol i Talem Wanem​—?Yu Yu Mas Prea i Go Long Meri? (Oktoba-Disemba, 2005) Mi tinghae long yufala ol Witnes blong Jeova from we fasin blong yufala i stret, i no gat poen long hem, mo ol magasin blong yufala oli givhan bigwan long mi. ?Be olsem wanem yufala i save talem se yumi no mas askem Meri blong i givhan long yumi? Hem i stap toktok long God from yumi blong yumi save stap long pis.

E. R., Spen

“Wekap!” i ansa: Olsem Wekap! i eksplenem, Baebol i talem se yumi mas prea long God nomo. I no gat wan tok long Baebol we i givim raet long yumi blong prea i go long wan narafala man. Andrew Greeley, wan Katolik pris we i raetem buk, i talem se: “Pija blong Meri i joenem Kristin skul wetem ol skul blong bifo we oli mekem wosip long ol mama god.” Taswe, wosip blong Meri i no wan Kristin tijing, be i wan tijing we i kamaot long ol hiten man. Maet save ya i niu long tingting blong yufala we i stap ridim Wekap! From samting ya, mifala i leftemap tingting blong yufala blong stadigud long Baebol blong faenemaot wanem we Baebol i rili tijim. Plante Witnes blong Jeova oli bin joen long Katolik skul bifo, be taem oli stadi long Tok blong God, oli lanem se God i wantem we yumi prea long hem tru long Jisas nomo. (Hibrus 7:25) Blong kasem moa save long saed ya, lukluk buk ya “?Wanem Samting We Baebol i Rili Tijim?”a Japta 15 blong buk ya i tokbaot from wanem i impoten we yumi mekem ol bilif blong yumi i laenap wetem Baebol. Nem blong japta ya se, “Wosip We God i Agri Long Hem.”

[Futnot]