Wan Yangfala We i Trabol i Kasem Help

SIBIA, wan yangfala gel blong Meksiko we i gat 13 yia blong hem, i luk we plante taem wan narafala gel long klas blong hem i stap krae. Sibia i traehad blong mekem hem i harem gud bakegen. Wan dei, gel ya i talemaot long Sibia se papa blong hem i wan alkolik mo i stap kilim mama blong hem.

Sibia i talem se: “Gel ya i talem long mi se hem i no moa wantem laef, mo se hem i traem finis blong kilim hem wan i ded. Hem i talem se i no gat wan narafala we i lavem hem, mo hem i harem se hem i stap hem wan nomo. Mi mi talem long hem se i gat wan Man we i lavem hem tumas, Man ya i moa impoten i bitim olgeta narafala man long heven mo wol. Afta, mi eksplenem long hem plan we Jeova i gat long saed blong ol man.”

Biaen, Sibia i givim wan buk long hem, hemia buk ya Ol Kwestin We Ol Yangfala Oli Askem Ol Ansa We Oli Wok Gud. Evri dei, long taem blong kakae long skul, Sibia i mekem stadi wetem hem long buk ya. Sloslo gel ya i jenis. Hem i no moa fraet blong joen wetem narafala, naoia hem i laekem blong storian, mo i laf wetem ol narafala. Long wan leta we gel ya i raetem long Sibia, hem i talem se: “Tangkiu tumas we yu stap olsem wan gudfala fren blong mi mo yu kasem save long mi. Longtaem finis, mi mi wantem wan sista blong mi, mo yu nao yu olsem sista ya. Naoia mi save se i gat narafala we i kea long mi​—hemia Jeova.”

Maet yu yu save wan yangfala we i nidim buk ya Ol Kwestin We Ol Yangfala Oli Askem. Sam long ol 39 japta blong hem i tokbaot: “?Olsem Wanem Mi Save Gat Ol Trufala Fren?,” “?Olsem Wanem Long Fasin Blong Slip Tugeta Bifo Mared?,” mo “?Olsem Wanem Blong Save Sipos Hemia i Trufala Lav?” Sipos yu yu wantem kasem buk ya, yu save fulumap pepa ya daon mo sanem i go long wan adres long pej 5 we i stret long ples blong yu.

□ Plis yu sanem buk ya long mi.

□ Plis, mi mi wantem se wan man i kam luk mi blong mekem Baebol stadi wetem mi we mi no pem.