“!Folem Kraes!”

Distrik Asembli Blong Ol Witnes Blong Jeova

Asembli ya blong tri dei i stat finis long Yunaeted Stet long manis Mei mo bambae oli mekem long plante taon raon long wol gogo kasem 2008. Long plante kantri, program blong asembli ya bambae i stat wetem miusik long 9:20 long Fraede moning. Wanwan long trifala dei blong asembli ya bambae i tokbaot Jisas.

Program blong Fraede i stanap long vas ya we i se: “Luklukgud Long Jisas. Hem i Bigfala Man We God i Yusum Blong Givim Bilif Long Yumi Mo Mekem Bilif Ya Blong Yumi i Stret Gud.” (Hibrus 12:2, NW) Faswan tok blong asembli ya hemia “?From Wanem Yumi Folem ‘Kraes’?” Wan narafala tok we i gat tri haf blong hem, hemia “Luksave Wok We Jisas i Mekem Olsem Bigfala Moses, Deved, Solomon.” Laswan tok long Fraede moning, hemia “Spesel Wok We Jisas i Gat Long Plan Blong Jeova.”

Long Fraede aftenun, faswan tok hemia “!‘Mifala i Faenem Mesaea Finis’!” Afta long hemia i gat narafala tok ya “Faenem Ol Sas Samting ‘We God i Haedem Long Kraes.’” Tok ya “Holem Tingting Blong Kraes” i wan tok blong wan aoa, we i gat faef haf blong hem. Sam long ol haf ya oli tokbaot “Hem i ‘Glad Nomo Blong Luk Olgeta,’” “Hem i ‘Obei Long God Gogo i Ded,’” mo “Hem i ‘Stap Lavem Olgeta Olwe.’” Program blong dei ya bambae i finis wetem tok ya “Oli ‘Stap Biaen Long Smol Sipsip Ya Long Evri Ples We Hem i Pas Long Hem.’”

Program blong Sarede i stanap long vas ya we i se: “Ol Sipsip Blong Mi Oli Save Harem Voes Blong Mi. ... Mo Olgeta Oli Save Biaen Long Mi.” (Jon 10:27) Tok ya “Folem Eksampol Blong Jisas Long Wok Blong Prij” i wan tok blong wan aoa, mo i gat tri haf blong hem. Tok ya bambae i givim sam gudfala advaes blong halpem yumi blong kam gud moa long wok blong prij. Afta bambae i gat tu narafala tok ya “Hem i ‘Laekem Ol Fasin We i Stret Mo i Agensem Ol Fasin We i No Stret’—?Yu Tu Yu Mekem Olsem?” mo “‘Agensem Setan’ Olsem Jisas i Mekem.” Ale, program blong Sarede moning bambae i finis wetem tok blong baptaes, mo biaen samfala bambae oli baptaes.

Program blong Sarede aftenun bambae i stat wetem tok ya “No Folem . . . ,” we i gat sikis haf blong hem. Ol sikis haf ya hemia “Bighaf Blong Ol Man We Oli Mekem Samting We i No Stret,” “Hat Mo Ae Blong Yufala,” “Ol Samting We Oli No Tru,” “Ol Giaman Tija,” “Ol Kastom Stori,” mo “Setan.” Biaen, i gat ol narafala tok ya “Tijing Blong Jeova i Hae Moa Long Ol Narafala Tijing” mo “Halpem Olgeta Blong Oli Kambak Insaed Long Yad Blong Ol Sipsip Blong God.” Laswan tok blong dei ya hem i wan impoten tok blong asembli, nem blong hem, “Yu Kam, Yu Biaen Long Mi, Yu Man Blong Mi.”

Stamba tok blong Sande hemia: “Yu Biaen Long Mi [“Oltaem,” NW].” (Jon 21:19) Afta long tok ya “Yu No Mas Faenem Eskius Blong No Moa Folem Jisas,” i gat wan tok we i gat sikis haf blong hem, se “Ol Sas Trutok Long Bigfala Toktok Antap Long Hil.” Ol haf ya bambae oli eksplenem mining blong sam long ol tok ya blong Jisas we hem i se “Olgeta We Oli Luksave Se Oli Nidim Ol Samting Long Saed Blong Spirit, Oli Save Glad,” “Fastaem Yu Mas Go Stretem Poen Ya Wetem Brata Blong Yu,” mo “Oltaem Yufala i Mas Gat Fasin Blong Givim, Nao Ol Man Bambae Oli Givim Samting Long Yufala.” Laswan tok blong moning hemia pablik tok ya “?Hu i Rili Ol Man Blong Kraes?” Wan spesel haf blong aftenun hemia drama we oli aktem stori blong Gehasi long Baebol. Gehasi i man blong givhan long profet Elisa, mo hem i gat fasin ya we hem i wantem tumas samting. Nao asembli bambae i finis wetem tok ya “!Gohed Blong Folem Kraes, Lida Blong Yumi We i No Gat Wan Man i Save Winim Hem!”

I gud yu mekem plan naoia blong stap long asembli ya. Blong save ples blong asembli we bambae i klosap moa long yu, yu save go long Haos Kingdom blong ol Witnes blong Jeova long ples blong yu, no yu save raet i go long ol man we oli wokem magasin ya. Long Wajtaoa blong Maj 1, i gat lis blong ol dei mo ples we bambae i gat asembli long hem long eria blong Saot Pasifik.