!Samting We Yu Yu Nidim i Stap Long Baebol!
◼ Long Kosiko aelan long Mediterenian Si, wan man mo woman blong hem we tufala i Witnes blong Jeova mo tufala i blong Franis, tufala i go long wan stori haos long taon blong Ajaccio. Tufala i faenem wan envlop long floa we i gat 400 euro mane insaed, be i no gat nem mo adres long envlop ya. Woman ya i eksplenem wanem samting we tufala i mekem, i se: “Mitufala i putum wan not long notisbod jes insaed long doa blong stori haos ya, se man we i lusum envlop ya i save ring long namba blong mitufala.”
Long nekis dei long sapa, wan woman i ring. Hem i talem sam samting blong pruvum se hem nao i lusum mane ya, nao hem i wantem kam luk tufala from. Hem i sapraes se tufala bambae i givimbak mane blong hem, nao taem hem i kamtru, hem i karem sam flaoa wetem hem blong givim long tufala. Mane we i stap long envlop ya, hemia pei blong hem, mo long nekis dei blong hem, bambae hem i go spel blong wan manis.
Long taem we hem i spel yet, hem i sanem wan kad i kam long tufala, blong talem tangkiu long tufala bakegen from kaen fasin blong tufala blong givimbak mane ya. Taem hem i kambak, tufala Witnes ya i go luk hem, mo tufala i tokbaot olsem wanem Baebol i save givhan long famle mo long fasin blong man evri dei, hemia samting we i pulum intres blong hem.
Tufala i tekem janis blong tokbaot sam poen long buk ya ?Wanem Samting We Baebol i Rili Tijim? Tufala i jusum japta ya “?Olsem Wanem Blong Mekem Famle Blong Yu i Hapi?” Woman ya i sapraes mo i talem se: “!Evri samting we mi mi nidim i stap long Baebol!” Hem i glad blong statem wan Baebol stadi.
Buk ya Baebol i Tijim i tokbaot famle laef, be i no hemia nomo. Hem i tokbaot trutok long saed blong God mo Jisas Kraes, mo tu, ol dedman oli stap wea, from wanem God i letem man i safa, mo plante narafala save we ol man oli intres long hem. Sipos yu yu wantem buk ya, yu save fulumap pepa ya daon mo sanem i go long wan adres long pej 5 we i stret long ples blong yu.
□ Plis sanem buk ya long mi.
□ Plis, mi mi wantem se wan man i kam luk mi blong mekem Baebol stadi wetem mi we mi no pem.