!Mekem Ol Man Oli Save Long Nem Blong God!

● Tingbaot sipos yu gat janis blong wokbaot i go long naesfala aelan ya Orleans, we i stap klosap long bigfala taon ya Quebec long Kanada. Long ples ya, yu save luk ol haos we oli soemaot klia se ol man we oli laef long taem bifo, oli strong long skul blong olgeta. Taem ol man oli wokbaot folem rod we i goraon long aelan ya, oli save luk yet se long ol wanwan eria, i gat sam olfala jos haos, we i mekem oli tingbaot bakegen laef blong ol olfala bifo.

Long yia 1717, wan bigfala jos i stanap long taon ya Saint-Pierre. Jos ya i olfala moa i bitim ol narafala jos we oli stap afsaed long ol taon blong Quebec. Long jos haos ya we naoia i wan ples blong lukluk ol naes pija we ol man oli droem, i gat wan nambawan samting i stap. Antap long olta, i gat ol fofala leta long Hibru lanwis, we oli prapa nem blong God long Baebol, hemia Jeova.

Tede, klosap yumi neva harem ol man long Katolik jos oli yusum nem blong God, mo i strong tu blong luk nem ya insaed long wan jos haos. Long yia 2008, Vatikan i raetem wan pepa we i talemaot desisen blong pop se, “oli no mas yusum mo talemaot” nem blong God long ol jos seves blong Katolik, long ol singsing blong jos, mo long ol prea blong olgeta tu. Be Baebol i talem klia nomo se, Jeova God i wantem we ‘ol man oli talemaot nem blong hem long olgeta ples long wol.’—Eksodas 9:16, NW.

Ol Witnes blong Jeova oli kasem save se blong mekem God i glad, i no naf we oli raetem nomo nem ya i stap insaed long haos wosip blong olgeta, be oli mas go moa. Taswe, evri yia ol Witnes blong Jeova long olgeta ples long wol, oli spenem bitim wan bilian haf aoa blong tijim ol man long saed blong nem blong God, mo stamba tingting blong hem. Mo tu, oli putumbak nem blong God, Jeova, long stret ples blong hem long Baebol. Baebol ya, The New World Translation of the Holy Scriptures, we ol Witnes blong Jeova oli wokem, i folem stret ol hanraet long olfala lanwis. Nem ya, Jeova, i stap bitim 7000 taem long ol hanraet ya. Kam kasem naoia, oli printim bitim 165,000,000 kopi blong Baebol ya New World Translation long 83 lanwis. Sam long olgeta oli fulwan Baebol mo sam oli haf blong Baebol nomo.Blong talem stret, naoia we yumi kasem save se nem blong God, hemia Jeova, yumi no mas askem se: ?From wanem yumi mas yusum nem ya? Be yumi mas askem se: ?From wanem yumi no yusum nem ya?

[Tok blong pija long pej 19]

Baebol ya, The New World Translation, we nem blong Jeova i stap long hem bitim 7,000 taem, oli printim fulwan, no sam haf blong hem, long 83 lanwis