Yumi Wokbaot i Go Long SPEN

SPEN i wan kantri we i gat plante naes ples mo plante man blong defren kantri oli stap long hem. Ol man oli planem plante garen blong wit, grep, mo olif tri. Spen i stap samwe long 14 kilometa longwe long Afrika.

Plante man Fonisia, Gris, mo Carthage oli muv i go long saot wes blong Yurop. Taem ol man Rom oli kamtru long ol yia 200 bifo Kraes, oli faet wetem ol man ya mo oli winim olgeta, mo oli singaot ples ya se Hispania. Biaen, ol man Visigoth mo Moors oli kam stap long ples ya mo oli lego plante samting blong kalja blong olgeta.

Long yia 2015, i gat bitim 68 milian man oli go visitim Spen. Plante oli go from we oli laekem hot weta blong ples ya, sanbij blong hem, mo blong lukluk ol samting we ol man oli wokem bifo. Mo tu, oli go from we oli laekem ol kakae blong Spen, olsem ol kakae blong solwota, ol mit, ol salad, mo ol legim we oli kukum, o oli putum olif oel long hem. Plante man raon long wol oli savegud ol kakae ya blong Spen, olsem omelet, paella mo tapas.

Ol man Spen oli kaen mo oli glad blong storian wetem ol man. Plante long olgeta oli se oli memba blong Katolik Jos, be smol nomo oli stap go long jos. I no longtaem i pas, ol man Afrika, Esia, mo Latin Amerika oli muv i go long Spen. Plante long olgeta oli glad blong tokbaot ol bilif mo kastom blong olgeta. Ol Witnes blong Jehova oli storian gud wetem olgeta, mo oli halpem olgeta blong lanem ol samting we Baebol i tijim.

Long 2015, i gat bitim 10,500 Witnes we oli glad blong go givhan blong bildim, o wokemgud 70 haos blong miting, we oli kolem ol Haos Kingdom. Ofis blong Minisipol i givim graon blong ol Witnes oli bildim ol Haos Kingdom long hem. Ol Witnes blong Jehova oli mekem miting long Spanis, mo tu long bitim 30 narafala lanwis, blong givhan long ol man blong ol narafala kantri we oli kam stap long Spen. Long 2016, i gat bitim 186,000 man we oli kam long wan spesel miting we ol Witnes oli mekem blong tingbaot ded blong Jisas Kraes.