Stadi 6
‘Mekem We Wok Ya Blong Rid Long Ol Man i Nambawan’
1, 2. ?Wetaem yumi gat jans blong rid long pablik?
1 Aposol Pol i talem long Timote se: “Yu mas mekem we wok ya blong ridim Baebol long ol man, . . . i nambawan wok blong yu.” Mo hem i talem long Timote blong i tijim samting ya mo sam narafala mak blong minista wok long ol narafala Kristin minista. (1 Tim. 4:13) Advaes ya we i kamaot long God i stret long ol minista blong God tede, mo i gud yumi lesin long hem.
2 Fasin ya blong rid long fored blong ol man i haf blong tiokratik wok. Long Wajtaoa Stadi mo long Buk Stadi yumi mas ridim ol haf mo sam vas long Baebol. Long Miting Blong Kingdom Wok mo long Tiokratik Skul, mo tu long wok blong prij, yumi stap ridim ol vas blong Baebol. Taswe i gud we yumi kam man blong rid gud long pablik, samting ya i save givhan long yumi wanwan mo long ol man we oli stap lesin long yumi.
3. ?From wanem i impoten blong yumi mekem riding i rere?
3 Man we i rid long fored blong ol man i mas rid long bigfala voes blong ol man oli harem. ?Be olsem wanem bambae ol man we oli lesin oli save kasem gudfala samting sipos ol man blong rid oli no talemgud ol tok mo ol tok blong olgeta oli no rongud no oli mekem voes blong olgeta i go antap long rong ples? ?Wanem tingting ol man blong rid oli save givim sipos oli no rid wetem laef, sipos voes blong olgeta i stap sem mak oltaem? Blong rid gud long wan grup, yu mas mekem i rere fastaem. I no gud blong go long miting blong rid, no maet long Buk Stadi blong rid sipos yu no ridim fastaem ol haf long buk no magasin we oli stap yusum. Sipos ol man blong rid oli mekem olsem bambae ol man we oli lesin oli no save kasem gudfala samting from, mo sipos oli talem ol tok i no stret, olgeta we oli stap lesin bambae oli mekem olsem tu. Yes, evri minista blong God oli mas traehad blong rid long pablik.—Hab. 2:2.
4, 5. ?Wanem fasin yumi mas gat taem yumi rid long pablik blong wekemap tingting blong ol man we oli lesin mo riding ya i isi blong oli haremsave?
4 Ol fasin blong rid we yu nidim. Taem yu rid, traem mekem riding blong yu i laef. Mekem riding blong yu i gat mining blong ol man oli haremgud long hem, soemaot filing blong ol tok. Olsemia nao bambae yu no save rid long fasin we i strong bitim mak mo i no gat laef long hem. Lukaotgud se yu no mekem voes blong yu i godaon bitim mak nao ol man we oli lesin long yu oli save mestem ol impoten poen. Voes blong yu hem i mas naf blong kasem olgeta haf blong rum no ples we ol man oli sidaon long hem. I no mas gat man we i stap traehad blong harem tok blong yu.
5 Yu mas talem ol tok i klia, yu no mas mestem sam tok, no yu joenem ol tok, mekem se tok i no gat mining. Mo tu, i nogud blong talem evri tok wanwan, samting ya i save pulum man oli lesin long ol tok nomo be oli no kasem bigfala mining we yu stap tokbaot. Fasin blong talemgud ol tok i min se man we i lesin long yu, i haremsave ol tok we yu stap ridim. Samtaem ol man oli no haremsave from voes blong man blong rid i no go stret long ol man we oli stap lesin. Taswe i gud blong leftemap hed blong yu taem yu rid. Openem maot blong yu blong mekem voes i klia.
6. ?Olsem wanem yumi jusum stret ples blong makemaot wan impoten tingting, mo olsem wanem fasin blong spel smol i givhan long saed ya?
6 I impoten blong mekem paoa blong voes blong yu i strong long stret ples. Yes, hem i givhan blong ol man oli save samting we yu stap ridim. I tru se taem paoa blong voes i jenis, samting ya i save givim wan defren mining blong ol tok long ol man we oli stap lesin. Samtaem yu mas talem wan tok long spesel fasin, be plante taem yu mekem olsem long wan ful toktok, blong makem se hem i impoten. Blong jenisim paoa blong voes long stret ples taem yu stap rid, yu mas jusum se wanem tingting yu wantem givimaot. Blong jusum tingting ya, yu mas tingbaot stampa poen long ful riding blong yu, i no long ful toktok ya nomo. Fasin blong spel smol long stret ples, i impoten blong makemgud ol poen. Fasin blong spel smol samtaem long stret ples i save pulum ol tok oli kam tugeta long ol smol grup, nao samting ya i save makem ol bigfala tingting. Be fasin blong spel longtaem lelebet hem i soemaot se yu kam long en blong wan bigfala poen.
7. ?Wanem samting i givhan blong mekem riding i olsem storeyan nomo?
7 Taem yu stap traehad blong rid gud yu mas tingbaot se voes blong yu i mas go antap no godaon, yu mas rid kwik no slou. Sipos yu no mekem olsem bambae riding blong yu i no gat laef mo ol man oli no glad blong lesin long hem. Be taem yu yusumgud ol defren rod blong ridim ol tok, bambae ol man oli harem riding blong yu i laef mo i olsem we yu stap storeyan nomo.
8. ?Wetaem oli stap givim tok we oli raetem?
8 Ol tok we oli raetem blong man i ridim. Fasin blong rid long pablik i impoten tumas taem i gat wan tok we oli raetem finis blong ridimaot. Tok olsem i stap kamaot samtaem. Eksampel, samtaem Sosaete i mekemrere tok we olgeta kongregesen blong ol man blong God long wan kantri oli save harem long semtaem. Mo bakegen, i gat ol tok we oli raetem blong ridim long taem blong ol asembli, from we maet ol man oli save raetem sam haf blong hem long ol nyuspepa, no oli wantem se ol tok ya oli mas stretgud.
9, 10. ?Wanem samting yumi mas traehad long hem taem yumi ridim wan tok we oli raetem? ?Mo olsem wanem yumi save winim trabol ya?
9 Blong ridimgud tok we oli raetem, i impoten blong talem ol tok mo ol ful toktok olsem we yu storeyan nomo. Yes yu mas rid long bigfala voes moa i bitim voes blong storeyan. Ol ful toktok blong ol tok olsem oli defren, oli longfala mo oli hadwok lelebet. Maet hem i gat ol tok insaed we yu mas talem long defren fasin mo maet spid blong hem i defren long spid we yu stap rid long hem oltaem. Maet yu harem se i moa gud blong yusum ol prapa tok blong yu blong mekem tok ya. Be fasin blong lan mo ekspiryens i save givhan long yu blong ridim ol tok we oli raetem finis.
10 Blong gat gudhan, i impoten blong mekemrere gud fastaem. Yu mas tektaem blong savegud tok ya we oli raetem blong yu ridim. Oltaem yu mas ridim bakegen tok ya blong kasem klia ol bigfala poen long hem. Sipos i gat sam tok we yu no savegud, i gud blong jekemap long wan gudfala diksonari mo makem saon blong ol tok olsem long pepa we tok i stap long hem. Nao traem ridim tok ya long bigfala voes blong yu save olsem wanem blong ridimaot tok ya folem fasin blong man we i raetem tok. Sam man blong rid oli faenemaot se fasin blong lan blong rid long fored blong wan glas blong lukluk fes i givhan long olgeta blong oli lukluk man taem oli rid, samting ya i impoten sipos oli givim tok long wan smol haos.
11.?Wanem mak yu save raetem long tok we oli raetem finis blong givhan long yumi taem yumi ridim?
11 I gud blong putum mak aninit sipos yu wantem soem se oli impoten. Sam man oli faenem se i gud blong oli droem stret laen blong seraotem ol haf blong ol ful toktok. Mo tu, i gat sam tok we oli stap long ol ful toktok we oli had mo oli narakaen, yu mas joenem ol tok blong talem olgeta. Yu save putum wan smol kruked laen antap long olgeta blong makem se taem yu kam long ol tok ya yu no mas spel gogo yu finisim ful toktok. Samting ya i givhan long olgeta blong oli no lusum mining blong ol tok. Sam oli putum sam mak blong soemaot se oli mas spel longtaem lelebet blong makem sam tingting. Fasin blong spel smol i mekem ol man oli lesingud blong harem nekis poen long tok, i olsem we yu talem bakegen poen mo i givim taem blong tok ya i save go insaed long tingting blong ol man. I impoten tu blong makem klia ol bigfala haf blong ol tok. Samting ya i save givhan long yu blong bildimap tok blong kasem mak ya mo biaen yu save rid i go slou moa.
12-15. ?From wanem i impoten blong mekemrere gud fastaem long Baebol riding?
12 Baebol riding. Fasin blong ridim Baebol i impoten tumas long ol yangfala mo olfala tu. I gat taem we oli mas ridim Baebol long bigfala voes. Long Tiokratik Skul i gat ol tok we oli stap mekem olsem. Mo yumi evriwan yumi stap ridim Baebol taem yumi toktok wetem ol man long wok blong prij. ?Olsem wanem, yumi stap rid gud? ?Olsem wanem, yumi lan blong rid gud, yumi ridim gud ol haf we i stret long tok blong yumi mo riding i rongud, olsem wan storeyan nomo?
13 Yumi mas reregud sipos hem i taem blong yumi blong ridim Baebol. Yumi mas tingbaot se hemia i Tok blong God, we i fulap long ol gudgudfala toktok mo oli gat filing, hem i stretgud olgeta mo hem i eksplenem gud ol samting. From samting ya, yumi mas traem blong ridimgud blong ol narafala we oli stap lesin oli save kasem gudfala samting from. Sipos yumi save se bambae yumi ridim Baebol, yumi mas mekem i rere gud fastaem, blong yumi no stop long ol tok, ol ful toktok no ol fasin blong talem ol tok, we oli narakaen.
14 Tingbaot hapi taem ya we ol man Isrel oli aot long kalabus oli kam hivap wanples long Get blong Wora long Jerusalem, blong oli lesin long ol tok blong God ya blong olgeta. ?Yu ting se ol Livaet oli no reregud blong rid long taem ya? Baebol i talem se: “Olgeta oli gohed blong ridim Loa blong trufala God, long buk ya, long bigfala voes, oli eksplenem, mo oli putum ol mining i go insaed. Mo oli givim dip save long ol man taem oli stap rid.” (Neh. 8:8) Ol man ya blong rid oli gat bigfala respek long Hae God, oli ridimaot tok blong hem long ol narafala man blong wosip.
15 Maet yumi rid long bigfala voes blong givhan long yumi wanwan, no insaed long famle blong yumi, no long Haos-Kingdom, no long wan man long doa blong hem, i gud yumi traehad blong ridimgud ol tok ya wetem filing mo paoa we oli stap long riding ya. Aposol Pol i tokbaot olsem wanem riding long fored blong ol man i save tajem hat blong olgeta i se: “Man we i ridim tok ya we God i givim, hem i save harem gud. Mo olgeta we oli harem, nao oli holem tok ya long tingting blong olgeta, olgeta ya tu oli save harem gud. From we taem blong ol samting ya i kam kolosap.”—Rev. 1:3.