Japta 16

Hem i Gat Strong Tingting Long Wosip Blong Jeova

OL BRATA blong Jisas—ol narafala boe blong Meri—hemia Jemes, mo Josef, mo Saemon, mo Judas. Olgeta oli stap wokbaot wetem Jisas mo ol disaepol blong hem, oli go long taon ya Kapaneam, we i kolosap long bigfala lugun blong Galili. Maet olgeta oli stop smol long ples blong olgeta long Nasaret. Ating famle i wantem karem sam samting we bambae oli nidim. Nao oli go long Kapaneam.

?Be from wanem Jisas i go long Kapaneam? ?From wanem i no gohed long minista wok blong hem long Kena, long Nasaret, no long sam narafala ples long ol hil blong Galili? From we taon ya, Kapaneam, i bigfala lelebet, mo hem i stap long gudfala ples. Mo tu, bighaf blong ol nyufala disaepol blong Jisas oli stap long Kapaneam no kolosap long taon ya. Taswe, olgeta oli no nidim blong livim ples blong olgeta blong kasem trening we bambae Jisas i givim long olgeta.

Long Kapaneam, Jisas i mekem plante bigfala wok. Sam manis biaen, hem wan i talem samting ya. Be i no longtaem, Jisas mo kampani blong hem oli wokbaot bakegen. Hemia taem we ol tri oli stap karem flaoa. Olgeta oli stap go long Jerusalem blong mekem Lafet blong Pasova long 30 K.T. Taem oli stap long Jerusalem, ol disaepol blong Jisas oli luk wan fasin blong Jisas we ating oli neva luk samtaem.

Loa blong God i talem se ol man Isrel oli mas kilim anamol, oli mas givim i go long God. Blong mekem i moa isi long olgeta, i gat sam man long Jerusalem we oli stap salem anamol mo pijin. Be olgeta oli stap mekem bisnes ya insaed long haos blong God. Mo tu, olgeta oli stap stilim mane blong ol man, from we oli putum praes blong ol samting ya i antap tumas.

Taem Jisas i luk samting ya, hem i kros. Nao hem i tekem sam smol rop, i mekem wip long hem, i ronem olgeta man ya oli aot long haos blong God. Mo hem i kafsaedem ol tebel blong ol man ya we oli stap jenisim mane, i sakem ol mane blong olgeta i go olbaot. Mo hem i tok long ol man we oli stap salem pijin, i se: “Yufala i tekem ol samting ya i go afsaed. Yufala i no mekem haos blong Papa blong mi i kam olsem ples blong maket nomo.”

Nao taem ol disaepol blong Jisas oli luk, oli tingbaot profet tok blong Baebol long saed blong Pikinini blong God, se: “Mi mi wantem evri samting blong haos blong yu i stret gud. Tingting ya i stap wok oltaem insaed long tingting blong mi, i olsem we faea i laet.” Be ol man Isrel oli askem se: “?Yu save mekem wanem saen blong soemaot long mifala we yu yu gat raet blong mekem ol samting ya?” Jisas i ansa, i se: “Sipos yufala i brekemaot haos ya blong God, bambae long tri dei, mi mi stanemap bakegen.”

Ol man Isrel oli ting se Jisas i minim haos ya blong God. Ale oli talem se: “Man, olgeta oli stap hadwok long fotesikis yia finis blong stanemap haos ya blong God. ?Olsem wanem bambae yu yu save stanemap long tri dei nomo?” Be haos ya blong God we Jisas i stap tokbaot, hemia bodi blong hem. Mo tri yia biaen, taem hem i laef bakegen long ded, ol disaepol blong hem oli tingbaot tok ya blong hem. Jon 2:12-22; Matyu 13:55; Luk 4:23.

▪ ?Afta long lafet blong mared long Kena, Jisas i wokbaot i go wea?

▪ ?From wanem Jisas i kros? ?Hem i mekem wanem?

▪ ?Taem ol disaepol blong Jisas oli luk samting ya, oli tingbaot wanem?

▪ ?Jisas i talem wanem long saed blong “haos ya blong God”? ?Hem i minim wanem?