Soemaot Se Save Ya i Givhan Olsem Wanem

NATING se yu stap toktok long wan man no long plante man, yu no mas ting se sipos yu yu laekem ol save ya, olgeta tu bambae oli laekem. I tru, save ya i impoten. Be sipos yu no soemaot klia se samting we yu talem i save givhan long olgeta olsem wanem, ating ol toktok blong yu bambae i no pulum tingting blong olgeta longtaem.

Samting ya i tru tu long ol tok blong yu long Haos Kingdom. Maet ol man oli lesin gud taem yu yusum wan pijatok no wan stori we oli no harem bifo. Be maet oli letem tingting i flae taem yu tokbaot samting we oli save finis, antap moa, sipos yu no traem givim sam moa save long olgeta. Yu mas givhan long olgeta blong oli luksave from wanem mo olsem wanem ol samting we yu talem bambae i givhan long olgeta.

Baebol i pulum yumi blong tingbaot olsem wanem blong yusum ol save long laef blong yumi. (Prov. 3:21) Jehova i yusum Jon Baptaes blong lidim ol man blong “oli folem waes blong ol stret man.” (Luk 1:17, Nyutesteman wetem Ol Sam long Bislama [NTB]) Hemia waes we man i kasem taem hem i tinghevi long Jehova mo i ona gud long hem. (Sam 111:10) Olgeta we oli tinghae long waes ya oli yusum blong winim ol hadtaem long laef naoia, mo blong putum fandesen blong laef ya we i prapa wan long fiuja, hemia laef we i no save finis.—1 Tim. 4:8; 6:19.

Yu Mekem Se Tok Blong Yu i Givhan Long Man. Sipos yu wantem se tok blong yu i givhan long ol man, yu mas tingting gud long ol save we bambae yu yusum. Mo tu, yu mas tingbaot se bambae yu toktok long wanem kaen man. Yu no mas tingbaot ol man olsem wan grup nomo. Insaed long grup ya i gat ol defren kaen man. Maet i gat ol pikinini, ol yangfala, ol papa mama, mo sam olfala. Maet i gat samfala we oli jes stat blong kasem save long trutok, mo olgeta we oli stap mekem wosip long Jehova longtaem finis, bifo we yu yu bon. Ating samfala oli fren gud wetem Jehova, be samfala oli gat sam fasin mo tingting blong wol yet. I gud yu skelem se: ‘?Samting we bambae mi tokbaot i save givhan olsem wanem long olgeta? ?Mi save mekem wanem blong givhan long olgeta blong oli kasem bigfala tingting long tok blong mi?’ Maet yu luk se i moa gud yu mekem tok blong yu i go long wan no tu kaen man nomo. Be yu no mas fogetem ol narafala tu.

Maet yu mekem wan tok long wan stamba tijing blong Baebol. Sipos ol man we oli lesin long tok blong yu oli bilif finis long tijing ya, ?yu save mekem wanem blong tok ya i givhan long olgeta? Yu mas traem mekem bilif blong olgeta i strong moa long tijing ya. ?Wanem rod blong mekem olsem? Yu save pulum olgeta blong oli tingting gud long ol samting we Baebol i talem blong sapotem tijing ya. Mo tu, yu save mekem se oli tinghae long tijing ya. Blong mekem olsem, yu save soemaot olsem wanem tijing ya i agri wetem ol narafala trutok blong Baebol mo wetem ol fasin blong Jehova. Yu save tokbaot samting we i hapen long laef blong sam man we tijing ya i givhan long olgeta, mo i mekem se oli gat gudfala tingting long fiuja.

Yu no mas wet go kasem lastok blong yu, blong soemaot se samting we yu tokbaot i save givhan olsem wanem long ol man. Long stat blong tok nomo, ol man wanwan oli mas harem se save ya i stret long olgeta. Taem yu putum wan fandesen olsem, yu save gohed blong soemaot se ol bigfala poen wanwan oli givhan olsem wanem long olgeta, mo yu save soemaot samting ya long lastok blong yu tu.

Taem yu soemaot se wan poen i save givhan olsem wanem long ol man, yu mas mekem long fasin we i laenap wetem ol rul blong Baebol. ?Hemia i minim wanem? Yu mas mekem long fasin we yu lavem ol man, mo yu kasem save long tingting blong olgeta. (1 Pita 3:8; 1 Jon 4:8) Yu traem tingbaot aposol Pol taem hem i stretem bigfala trabol long Tesalonaeka. Hem i no tokbaot trabol ya nomo. Be hem i talem ol gudfala samting tu we oli soemaot se ol Kristin brata sista long ples ya oli gohed gud. Hem i trastem olgeta tu, se bambae oli wantem mekem wanem we i stret blong fiksimap trabol ya. (1 Tes. 4:1-12) !Hemia wan gudfala eksampol blong folem!

Maet yu mas givim wan tok blong pulum ol man oli joen moa long wok blong talemaot gud nius mo tijim ol man. Sipos i olsem, yu mas mekem ol man oli tinghae long wok ya, mo yu mas pulum olgeta blong oli glad blong mekem wok ya. Be taem yu stap mekem olsem, yu no mas fogetem se olgeta man oli no sem mak. Samfala oli save mekem moa wok i bitim ol narafala, mo Baebol tu i talem samting ya. (Mat. 13:23) Yu no mas mekem ol brata blong yu oli sem. Hibrus 10:24 i talem se yumi mas ‘mekem olgeta oli strong blong lavem ol man, mo blong mekem ol gudfala fasin.’ Sipos yu givhan long olgeta blong oli kam strong moa blong lavem ol man, bambae oli wantem mekem ol gudfala wok. Jehova i no wantem we ol man oli mekem samting from we yu talem long olgeta nomo se oli mas mekem. Hem i wantem we yu bildimap ‘bilif blong olgeta, nao oli save obei.’ (Rom 16:26) Taswe yu mas traem mekem bilif i kam strong moa, hemia bilif blong yu mo blong ol Kristin brata sista blong yu tu.

Yu Soemaot Se Gud Nius i Save Givhan. Taem yu prij long ol man, yu no mas foget blong soemaot se gud nius i save givhan olsem wanem long olgeta. Blong mekem olsem, yu mas tingbaot wanem samting we ol man long ples blong yu oli stap wari long hem. ?Olsem wanem blong faenemaot samting ya? Yu save lesin long nius long radio mo televisin. Yu save lukluk long fas pej blong niuspepa. Mo tu, yu mas traem pulum ol man blong oli talemaot tingting blong olgeta, mo yu mas lesin long ol toktok blong olgeta. Maet yu luksave se oli stap traehad blong winim sam bigfala trabol. Ating oli lusum wok blong olgeta, oli no gat mane blong pem renhaos, oli sik, wan famle i jes ded, oli fraet long raf fasin, wan haeman i mekem i no stret long olgeta, mared blong olgeta i brok, oli gat ol smosmol pikinini we oli mas tijim, mo ol narafala samting olsem. ?Olsem wanem? ?Baebol i save givhan long olgeta? Yes.

Taem yu statem wan storian, yu gat wan samting long tingting blong yu we yu wantem tokbaot. Be sipos man we yu storian wetem hem i talem wan narafala samting we i stap long tingting blong hem, yu no mas fraet blong jenisim storian sipos yu yu naf blong mekem olsem. Nao yu tokbaot samting ya we hem i talem. Sipos yu no naf, yu save talem se bambae yu go lukaot save long saed ya, mo bambae yu kambak long wan narafala taem. I tru, yumi no “go insaed long bisnes blong ol narafala man.” Nating se i olsem, yumi glad blong serem ol advaes blong Baebol we i save givhan long olgeta. (1 Tim. 5:13) Ol man oli glad moa long advaes blong Baebol we i stret long laef blong olgeta wanwan.

Sipos wan man i no kasem save se ol tok blong yu bambae i givhan olsem wanem long hem, ating hem i no save storian longtaem wetem yu. Sipos hem i letem yu yu gohed blong toktok, be yu no soemaot se storian ya i save givhan long hem olsem wanem, ating ol toktok blong yu bambae i no mekem wan samting long laef blong hem. Be sipos yu yu soemaot klia se save ya bambae i givhan olsem wanem long hem, maet hemia nao stat blong wan bigfala jenis long laef blong hem.

Taem yu mekem Baebol stadi long wan man, yu mas soemaot oltaem se samting we hem i lanem i save givhan olsem wanem long laef blong hem. (Prov. 4:7) Yu mas givhan long hem blong i kasem save long ol advaes, ol rul, mo ol eksampol long Baebol, we oli soemaot olsem wanem blong folem ol rod blong Jehova. Yu save tokbaot ol gudfala samting we i kamaot taem hem i mekem olsem. (Aes. 48:17, 18) Samting ya bambae i pulum hem blong i jenisim sam samting long laef blong hem. Yu mas tijim ol man blong oli lavem Jehova, mo blong oli wantem mekem hem i glad. Nao hat blong olgeta bambae i pulum olgeta blong oli folem ol advaes long Tok blong Hem.