Fastok Blong Haf 7

Ol stori we oli kam biaen oli kavremap 80 yia, oli tokbaot plante samting we i hapen long laef blong King Sol mo King Deved. Fastaem, tingting blong Sol i stap daon mo hem i ona gud long God. Be smoltaem biaen, fasin blong hem i jenis nao hem i no moa wantem folem ol tok blong Jehova. Jehova i no moa wantem hem, mo i talem long Samuel se i mas kafsaedem oel long hed blong Deved, blong makemaot hem blong i kam nekis king blong Isrel. Sol i jalus, mo plante taem hem i traem kilim Deved i ded. Be Deved i no givimbak. Jonatan we i boe blong Sol, i save se Jehova i jusum Deved blong i kam king, taswe hem i sapotem Deved oltaem. Deved i mekem sam bigfala sin, be hem i lesin taem Jehova i stretem hem. Sipos yu gat pikinini, givhan long hem blong i luksave se oltaem hem i mas respektem plan we God i putumap.