Ripot Long Wok Blong Kingdom

Oli Trastem Jeova

OL WETNES BLONG JEOVA oli tingting hevi long oda blong Jeova blong go talemaot gud nyus blong Kingdom long olgeta ples long wol. Oli wantem givim jans long ol man long olgeta nesen blong kasem save long ol promes blong God long saed blong nyufala wol. Gavman blong sam kantri oli blokem wok blong yumi, mo plante taem, ol lida blong ol skul blong Krisendom oli pusum olgeta blong mekem olsem. Samting ya i hapen long wan kantri long Afrika. Be ol Wetnes blong Jeova long ples ya oli mekem olsem King Deved bifo. Hem i talem se: “Mi mi trastem hem [God], nao bambae mi no save fraet.” (Ol Sam 56:11) Ol ekspiryens blong ol brata blong yumi long kantri ya long Afrika oli soemaot se oli trastem Jeova mo oli stap gohed long impoten wok blong hem.

Wan Wetnes we hem i hedtija long skul, hem i strong blong ‘obei long God, hem i no save obei long ol man nomo.’ From samting ya, hem i talemaot se hem i no joen long ol bisnes blong gavman. (Ol Wok 5:29) Ol man oli kilim hem nogud. Hem i ting se bambae oli jajem hem se hem i agens long gavman. Olgeta evriwan oli ting se bambae ol man oli kilim hem i ded. Be Wetnes ya i trastem Jeova. Hem i holemtaet bilif blong hem mo hem i eksplenem from wanem tingting blong hem i strong long saed ya. ?Wanem i kamaot from? Oli letem hem i go fri, oli karem hem i gobak long taon blong hem, mo ol man blong gavman we oli bin kilim hem oli talem sore long hem. Gudfala Wetnes ya i kasem wok blong tija bakegen, mo oli leftemap hem i tekem wok blong inspekta long ol skul.

Bos blong wan skul i sakemaot wan Wetnes tija long wok blong hem. Wan manis biaen, wan spesel paenia i givim buk ya Yu Save Laef Foreva Long Paradaes Long Wol long bos ya, mo hem i agri blong mekem Baebol stadi. Hem i stadi gogo hem i finisim japta 6, nao hem i livim wok blong hem olsem bos blong skul ya. Hem wetem waef blong hem tufala i stat go long ol miting blong ol Wetnes blong Jeova. Nao long wan Sande moning long miting, tija we i lusum wok blong hem i sapraes mo i glad blong luk man ya we i bin sakemaot hem long skul. Hem i glad blong faenemaot se man ya bambae i kam wan brata blong hem long saed blong speret.

Wan narafala ekspiryens long kantri ya i soemaot olsem wanem ol Wetnes blong Jeova oli tijim ol man blong respektem ol rul blong Jeova mo blong traehad blong mekem ogenaesesen blong hem i stap klin. Wan spesel paenia we hem i stap wok hem wan long wan ples, hem i kasem bigfala trabol. Hem i blong wan narafala laen mo ples, taswe ol enemi blong trutok oli wantem ronemaot hem long velej. Be jif blong velej i talemaot gudfala fasin blong man ya mo ol gudfala frut blong minista wok blong hem, mo hem i blokem olgeta we oli wantem ronemaot hem. Jif ya i talem se i stat long taem we spesel paenia i kam long ples blong olgeta, ol man oli ona moa long ol haeman, from we oli pem takis blong olgeta mo wan taem evri wik, oli mekem komuniti wok long rod.​—Rom 13:​1, 7.

Nao wan naet oli faenemaot se wan narafala Wetnes i slip wetem wan woman we i no wan Wetnes. Ol man oli mekem plante toktok from. Jif i singaot spesel paenia i kam long hem. Nao hem i tok strong long brata ya i se: “Hemia brata blong yu ya we oli faenemaot se hem i mekem rabis fasin ya. Ol Wetnes blong Jeova oli sem mak nomo long ol narafala skul.” Be spesel paenia i eksplenem se: “Mifala i no stret gud olgeta. Be mifala i defren long ol narafala skul from we mifala i no agri nating long fasin blong ol man we oli mekem ol bigfala sin olsem.”

Wetnes ya we hem i mekem rabis fasin ya hem i kalabus blong taem we oli makemaot, mo hem i pem faen. Mo tu, oli putumaot hem long kongregesen from we hem i no tanem tingting blong hem from sin blong hem. Jif i glad long samting ya mo hem i satem maot blong olgeta we oli jikim ol Wetnes blong Jeova. Jif i talem se: “Yufala i no mas tok nogud agens long ol Wetnes blong Jeova. Olgeta oli gat trutok. Ol narafala skul oli no stap mekem samting ya.”

Ol trufala Wetnes long kantri ya oli stap folem advaes blong Sam 37:​3, i se: “Yu mas trastem Hae God [Jeova, NW], mo yu mas mekem ol fasin we i gud, blong yu stap long graon ya, yu harem gud from we yu yu sef.” ?Bambae yumi trastem Jeova olsem ol Kristin man ya oli stap mekem?