Ol Man Gibeon Oli Lukaot Pis
TAON ya antap long hil i stap long ples ya we bifo Gibeon i stap long hem, samwe 10 kilomita long not blong Jerusalem.
Maet yu save se Gibeon i kam wan impoten ples jes afta we Josua i lidim ol man Isrel i go long Promes Lan mo winim Jeriko long faet. Ol man Kenan long Gibeon oli luksave se oli no naf blong stopem Isrel, we God i stap halpem hem. ?Wanem samting bambae oli mas mekem? Ol man Gibeon oli sanem sam man blong olgeta, olsem wan trik se oli kam longwe. Long rod ya oli kasem pis, Isrel i mekem wan kontrak wetem olgeta. Taem trik blong olgeta i kam long klia ples, oli kam man blong karem ol wud mo wora blong ol man Isrel.
God i agri long ol man ya we oli lukaot pis. Hem i givhan long Josua blong sevem ol man Gibeon taem ol faef king oli faet agensem olgeta. Jeova i mekem merikel we dei ya blong faet i longfala moa.—Josua 9:3-27; 10:1-14.
Long hil ya ol man blong digim graon oli faenem wan dip hol, no ples blong wora, we oli katem tru long ston. Ol man Gibeon oli go insaed long hol ya blong kasem wora long hem. Maet hemia i “wel blong Gibeon” we 2 Samuel 2:13 i stap tokbaot. Ol man blong digim graon blong stadi long ol samting we oli faenem, oli faenem sam rum aninit long graon we oli katem tru long ston mo i gat plante samting blong wokem waen i stap long hem. Yes i luk olsem we Gibeon i bigfala ples blong mekem waen.
Long taem blong Deved, haos tapolen, no tabenakel, blong trufala God i stap long ples ya. King Solomon i stap kam long ples ya blong mekem sakrafaes. Long ples ya nao Solomon i luk Jeova long wan drim mo i mekem promes se Solomon bambae i “waes mo gat save long hat,” mo tu hem i save gat plante rij samting. (1 King 3:4-14; 2 Kronikel 1:3) Ol haf we oli kamaot long ol pej 12 go kasem pej 17 long magasin ya oli soem se laen blong ol man we oli stap long Gibeon oli gat sam spesel wok blong mekem long medel blong nesen ya blong God long narafala taem. ?Yu save olsem wanem?
[Foto Credit line Blong Pija Long Pej 32]
Pictorial Archive (Near Eastern History) Est.