Faea i Statem Plan Blong Bildim Haos
“!FAEA! !Faea! !Faea i bonem Haos Asembli blong ol Wetnes blong Jeova!” Ol man oli singsingaot olsem long wan Fraede aftenun long Oktoba 1989 long ples ya Herenvan, wan taon long not blong Neselan.
Ol Wetnes blong Jeova oli yusum Haos Asembli ya long 11 yia finis. Kolosap evri wiken, plante handred man oli stap hivap long wan seket asembli blong tu dei no wan dei asembli long ples ya. Hem i wan gudfala ples blong tijim Baebol.
Akseden ya i kamaot taem ol man oli stap mekem wok long ruf blong haos ya. I no longtaem, faea ya i spolemgud haos ya. Be i gud, we i no gat man i karem kil long taem ya.
Ol Wetnes oli harem nogud from samting ya be tingting blong olgeta i no foldaon olgeta, oli mekem plan blong bildim wan nyufala haos olsem long wan narafala ples. Oli faenem wan gudfala ples long Swifterban, hemia long eria blong Flevolan. Ples ya i wan bigfala graon we Suider Se i stap long hem bifo, hem i 5 mita daon moa long level blong solwora.
Long Janewari 1991 oli askem ol man blong stat bildim nyufala Haos Asembli ya. Bambae oli stat bildim haos ya long manis Mei mo oli finis long Septemba 1991. Plante handred Wetnes oli go blong wok long ples ya, mo sam yangfala man oli luk wok ya olsem wan jans blong stat mekem fultaem wok blong Jeova. Plante man oli kam long Beljiom mo Engglan.
Oli bildim wan naesfala haos. Oli putum glas ruf long ples blong wokbaot we i seraotem rum we ol man oli stap sidaon long hem mo rum blong kakae. Bigfala rum i gat 1,008 jea blong ol man i sidaon long hem, mo narafala rum i save gat 230 man i stap long hem, oli lukluk televisin blong luk ol samting we i kamaot long bigfala rum.
Tede plante taosen man oli stap talem se: ‘Yufala i kam, blong yumi go antap long bigfala hil blong Jeova, mo bambae hem i tijim yumi long ol fasin blong hem.’ (Aesea 2:2, 3) Haos Asembli ya i wan long plante haos we oli stap yusum blong tijim ol samting long saed blong speret long ol man. Haos-Kingdom blong ol Wetnes blong Jeova long ples blong yu i wan long olgeta. Long ples ya bambae yu faenem se oli glad blong mekem welkam long yu.