Oli Save Lanem Samting Long Ol Sugabag

“Ol yia we i pas i no longtaem, ol man blong wokem plan blong ol samting oli luksave wan samting we ol sugabag oli savegud: oli tantanem wan samting we i smol mo oli wokem wan samting we i gat sikis saed blong hem blong putum eg blong olgeta long hem, samting ya i strong moa bitim olgeta narafala samting we oli wokem long ol defren fasin.”​—The New York Times, Oktoba 6, 1991.

YUMI no sapraes se ol man oli save lanem plante samting taem oli stadigud long ol smol bebet. Wan man blong bilif bifo, Job, i talem se: “Plis askem ol anamol blong haos, mo bambae oli tijim yu. Mo tu askem ol samting we oli gat wing oli stap flae long skae, bambae oli talem long yu. . . . ?Hu long olgeta ya i save talem se han blong Jeova i no mekem samting ya?” (Job 12:​7-9) Ol smosmol rum we oli gat sikis saed long haos blong sugabag i soemaot klia waes fasin blong God.

Wol blong ol rum ya i olsem smolhaf blong milimita, be oli strong. Oli save holem samting we i hevi olsem 30 taem long hevi blong olgeta.

Ol man oli save yusum paoa ya long ol narafala samting, oli yusum blong protektem ol samting wetem. Hem i stopem ol tul blong ol soldia we oli sakem i kamdaon long parasut blong oli no brok. Nyuspepa ya The New York Times i talem se: “Ol hevi samting olsem ol trak oli fasem long ol platfom we oli wokem wetem ol smosmol rum we oli gat sikis saed long hem blong blokem hem taem hem i foldaon long graon.”

Ol samting we ol man oli wokem long fasin ya oli save mekem long plante narafala samting. Samting we oli yusum moa hemia pepa. Naelon pepa mo wan kaen glu (resin) oli yusum blong wokem ol samting we oli gat sikis saed blong hem mo oli putum insaed long ol bigfala plen. Oli no hevi, be oli strong. ?From wanem?

From plante spes insaed i win nomo, taswe oli no hevi tumas. Mo win ya i holem ol samting i stap gud tu.

Ol sugabag oli no rili “save” olgeta samting ya, from we oli no skul blong lanem ol save ya. Be, evri dei oli wok wetem tingting mo waes we Jeova God i givim long olgeta.