“Waef Blong Yu We i Mared Long Yu Taem Yu Yang”
“FASIN blong stilim man no woman blong narafala kolosap i hapen evri dei.” Nyuspepa ya Los Angeles Times i talem se plante man blong hae save oli tingting olsemia. ?Yu yu sapraes long tok ya? Dokta we i stadi long tingting blong ol man, Frank Pittman i talem se samwe long stret haf blong ol hasban (50%) mo plante waef (30% no 40%) oli no stap tru long hasban no waef blong olgeta. !Sipos samting ya i tru, kolosap stret haf blong ol man mo woman we oli mared oli stilim man no woman blong narafala!
?Samting ya i min se fasin blong slip olbaot i oraet nomo? !No gat! From we fasin blong no stap tru long hasban mo waef i stap kam antap bigwan samting ya i no min se hem i oraet—olsem we taem fasin blong kilim man long rod i stap kam antap i no mekem se fasin blong stil i oraet. Fasin blong slip olbaot i spolem plante man. Eksampel, tede fulap man oli stap kasem ol nogud sik from rabis fasin long saed blong seks, be oli save blokem olgeta sik ya evriwan sipos ol man ya oli gat klin fasin long laef blong olgeta. Bigfala sik ya AIDS i no save kam bigwan sipos ol man oli holem gudfala fasin long saed blong seks.
Mo tu nating we man i haeman no “hem i gat plante save” be hem tu i harem i soa taem hasban no waef blong hem i no stap tru long hem. Sipos hasban no waef blong hem i slip wetem narafala wan taem nomo, hem i save harem nogud tumas we i tekem haf long laef blong hem blong haremgud bakegen.
Be bigfala samting se fasin ya blong no tinghevi long promes blong mared i soemaot se ol man ya oli no gat respek long God nating, from God nao hem i Stampa blong mared. Baebol i talem se: “Mared i wan fasin we yufala evriwan i mas tinghae long hem.” Mo tu Baebol i givim woning se: “God bambae i jajem boe mo gel we tufala i slip wan ples, mo bambae i jajem man we i slip wetem woman we i no woman blong hem, mo woman we i slip wetem man we i no man blong hem.”—Hibrus 13:4.
Taswe ol waes man oli harem tok blong God se: “Stap glad wetem waef blong yu we i mared long yu taem yu yang yet.” (Proveb 5:18) Olgeta ya oli lukaot fasin glad mo haremgud wetem prapa waef no hasban blong olgeta. Olsem nao, oli blokem ol sik blong bodi mo tingting, mo impoten moa, oli ona long Bigfala Man ya we i Stampa blong mared, Jeova God.