Wan Tru Man Blong Talemaot Gud Nyus i Hivimap Kakae
WILLIAM R. BROWN i go fastaem long Afrika long 1923. Wetem waef blong hem mo wan pikinini, hem ‘i mekem wok blong talemaot gud nyus’ long Gambia, Gana, Liberia, Naejiria, mo Siera Leon. (2 Timote 4:5) Frut blong wok blong hem i bigwan tumas.
Man ya we i blong Wes Indis i no wan memba blong ol jyos blong Krisendom mo tu hem i no joen long ol politik. Be, hem i folem eksampel blong Jisas mo ol aposol blong talemaot nem mo hae rul blong Jeova, hem i soemaot se ransom i impoten mo i talemaot gud nyus blong Kingdom. (Matyu 9:35; 20:28; Jon 17:4-6) William R. Brown i yusum Baebol oltaem, hem i poenemaot se Baebol i nambawan rod blong save ol samting long saed blong ol tijing mo bilif. (2 Timote 3:16) From se plante taem hem i mekem olsem, ol man oli singaot hem se Baebol Brown.
Wetem blesing blong Jeova, ol sid we Baebol Brown i sakem oli kamaot mo oli gru. Tede, long ol ples ya we hem i soemaot rod, kolosap 200,000 man Afrika finis oli givim laef blong olgeta long Man we i Wokem olgeta, mo long sem fasin oli talemaot gud nyus blong Kingdom long ol narafala. (Matyu 24:14; 1 Korin 3:6-9) Ol Kristin ya we oli stap gohed yet ol man oli savegud olgeta from stret fasin mo gudfala fasin blong olgeta. Oli flas tumas blong kam ol Wetnes blong Jeova mo stap aninit long Kraes, King we i stap rul naoia.
Frut olsem i kamaot from wok blong talemaot gud nyus blong ol trufala Kristin. Sem mak bakegen oli stap hivimap ol kakae raon long wol long ol kantri we i gat man long hem. Long bitim 200 kantri, oli “karem kakae” long bitim fo milyan man mo woman we oli gat gudfala hat mo olgeta ya oli talemaot bakegen long ol narafala ol tok blong enjel ya blong talemaot gud nyus se: “Yufala i mas onagud long God, mo yufala i mas leftemap nem blong hem, from we taem i kam finis blong hem i jajem olgeta man.” (Revelesen 14:7) Tru ya, wan rod nomo blong faenem hop long taem blong yumi we i trabol, hemia: yumi mas lukluk i go long God mo obei long rul blong Kingdom blong hem.