“Olsem Wan Laeon We i Stap Singaot Bigfala”
?YU YU bilif se Setan i stap? Tede, plante man oli no bilif se Setan i stap. I luk olsem tingting blong olgeta se bilif ya “i no stret i no laenap wetem sayens.” Mo tu long 1911, Encyclopædia Britannica i talem se: “Ol sayentis oli bin eksplenem plante samting we oli stap raonabaot long yumi mo laef we i stap insaed long man, nao i luk olsem i no gat rum blong Setan.” Ol man we oli gat bigfala save long Baebol oli ting se Setan i wan saen, wan kastom store nomo. The World Book Encyclopedia i talem se: “Plante man tede we oli gat big save long Baebol oli tingbaot Devel olsem wan saen blong paoa we i nogud, blong ol nogud fasin we ol man oli stap mekem.”
?Be olsem wanem long samting ya? Sipos yu bilif long Baebol, yu mas bilif se Setan i rili stap. Jisas i no bilif nomo se hem i stap be i kolem hem se “masta blong wol ya.” (Jon 14:30) Aposol Pol i singaot Setan se hem i “god blong wol ya.” (2 Korin 4:4) Mo sam yia afta olfala aposol Jon i talem se: “Olgeta man blong wol oli stap long paoa blong Setan.”—1 Jon 5:19.
Sipos yu no agri long tok blong Jon, traem tingbaot ol yia we oli jes pas. Tingbaot ol grup blong ol soldia we oli kilim man i ded mo ol trabol soa we ol gavman oli stap mekem long ol man. Tingbaot ol faet mo fasin blong spolem ol man we yumi stap luk. ?Be olsem wanem long ol rabis fasin blong brekem loa we oli stap long fas pej long ol nyuspepa blong yumi—man i kilim plante man i ded wantaem, fasin blong fosem woman, oltaem man i kilim narafala man i ded, man i fosem pikinini blong mekem nogud long saed blong seks? Hemia blong talem samfala nomo. ?Olsem wanem, Setan i god blong wol ya?
Kristin aposol Pita i givim woning se: “Yufala i mas lukaot gud. Yufala i mas rere. Enemi ya blong yufala Setan, hem i stap raon long yufala oltaem. Hem i olsem wan laeon we i stap singaot bigfala, i stap lukaot man blong i kakae.” (1 Pita 5:8) ?Sipos wan laeon i stap lus samples long medel blong ol haos blong ol man we oli stap kolosap long yu, bambae yu stap tokbaot se hem i stap no i no stap? ?No bambae yu yu resis mo lukaot wan samting blong protektem yu?
Yu mas sua se Setan i rili stap. Hem i no gat sore mo i save mekem nogud trabol long ol man, mo hem i strong moa bitim yumi. Ale yumi mas resis blong go haed long Wan we i moa strong bitim ol narafala. “Nem blong Jeova i olsem wan strong haos. Ol stret man oli resis blong go haed long hem, nao hem i lukaot long olgeta.” (Proveb 18:10) Kam long Jeova God blong i lukaotgud long yu, mo bambae yu save se i no longtaem bambae ol man oli fri long ol trabol we nogud man ya Setan, i stap mekem. !Bambae samting ya i gud tumas!—Revelesen 20:1-3.