“Wan Wetnes Long Skae We i Stap Longtaem”

LONGTAEM bifo we faswan man i wokbaot long wol, long naet mun i stap saengud finis long skae. Bifo, plante man oli wosipim hem olsem wan woman god. Plutak, wan man Grik we i stap raetem ol buk, i talem se mun i wan laswan ples we stret sol i save go long hem taem man i ded. Ol man blong talem kastom store long Baltik oli talem se mun i wan man, hasban blong san. !Tufala i gat wan rao long mared blong tufala, mo mun i ronwe long waef blong hem, wanwan taem nomo hem i save stap wetem woman blong hem long skae!

Tede, sam yangfala​—boe mo gel we oli laeklaekem tufala, oli stap storyan tugeta long saed blong tufala mo oli lukluk mun. Sem mak tu wetem tu olfala. Long ol yia we oli ron biaen long 1960 ol sayentis oli bin spenem bigfala mane blong putum man long mun mo blong karembak sam kilo blong ston blong oli mekem stadi long hem. Wan samting long saed blong mun oli sua long hem. Evri dei, stret long taem bambae hem i girap mo i godaon. Oltaem mun i folem rod blong hem nomo. Hem i no save mestem. From samting ya ol man oli save talem stret taem we wol i bin blokem san long mun taosen yia bifo.

Taem ol man Isrel oli lukluk i go long mun, oli tingbaot wan nambawan samting. God i bin promes se Kingdom blong King Deved i no save lus. Hem i talem se: “Olsem we mun i stap oltaem bambae hem [laen blong Deved] i stanap strong oltaem, olsem wan wetnes long skae we i stap longtaem.” (Ol Sam 89:​35-37, NW) Promes ya i go stret long Jisas, “Laen blong Deved.” (Luk 18:38) Afta long ded blong Jisas, hem i girap i laef bakegen wetem wan speret bodi we i no save ded bakegen samtaem mo hem i go antap long heven. (Ol Wok 2:​34-36) Long stret taem blong hem, God i putumap hem olsem King blong Kingdom blong God long heven. (Revelesen 12:10) Naoia Kingdom ya i stap rul mo “hem nomo bambae i stanap olwe.” (Daniel 2:44) Long rod ya Jisas, man ya we i no save ded samtaem we i kam long nem blong Kingdom blong Deved, bambae i stap longtaem olsem mun, “wan wetnes long skae we i stap longtaem.”

Taswe, long evri naet we yu luk mun i stap saengud long skae, tingbaot promes we God i givim long Deved mo talem tangkyu se Kingdom blong God i stap rul naoia mo bambae i rul foreva, long glori blong God mo blesing blong olwe long olgeta we oli gat strong bilif.​—Revelesen 11:15.

[Foto Credit Line Blong Pija Long Pej 32]

Frank Zullo