!Fasin Blong Slou i Bin Givim Ded!

TRIFALA famle, i gat seven bigfala man mo sikis pikinini, oli resis kwik blong sevem laef blong olgeta. Oli hivap wanples blong haed long haos blong wan man, oli hop blong sef long ol ston we oli stap foldaon we i mekem oli fraet tumas. Be taem bigfala noes blong ol ston we oli stap folfoldaon i stop, wan samting i kamaot we i statem wan narafala fraet​—wan blak klaod blong ases we i mekem se man i no moa save pulum win. Naoia oli no save mekem wan samting be oli mas ron.

Fastaem i gat wan man, ating wan wok boe, we i ron wetem wan bag long solda blong hem we i gat ol kakae i stap insaed. I gat tufala boe i folem hem, wan i gat kolosap fo yia blong hem, narafala i gat faef yia, oli holem han blong olgeta mo oli stap ron. Ol narafala oli kam biaen​—oli fraet tumas, oli traehad, oli foldaon, oli stap hareap blong ronwe. Oli traem pulum win, be oli no pulum gudfala win, oli pulum doti smok blong ases. Wan i foldaon afta long narawan, olgeta 13 man ya oli foldaon mo oli slip long ples ya we oli no moa save mekem wan samting mo biaen ol ases we oli stap folfoldaon oli berem olgeta. Ol bun blong olgeta oli bin stap haed kasem taem we ol man blong digim graon oli faenem olgeta kolosap 2,000 yia biaen mo oli eksplenem ol nogud samting we i hapen long olgeta long ol laswan menet long laef blong olgeta.

Ol 13 man ya we oli kasem trabol, i smol namba nomo long samting olsem 16,000 man we bifo oli lus long taon ya Pompei, long Itali, long Ogis 24, 79 K.T. Plante oli sef from oli ronwe long taon ya taem hil ya Vesuvius i sakem faea blong hem fastaem olgeta. Be, olgeta we oli slou​—plante long olgeta hemia ol rijman we oli no wantem livim haos blong olgeta mo ol samting we oli gat​—oli stap sikis mita aninit long ston mo ases we i berem olgeta.

Samting we i hapen long Pompei kolosap 2,000 yia bifo i save kam olsem wan samting blong bifo. Be long plante rod hem i sem mak long taem we ol man oli stap fesem tede. Wan saen blong wol, samting ya i nogud moa bitim bigfala noes blong hil ya Vesuvius, i stap givim woning se kolosap tumas bambae plan blong wol naoia bambae i lus. Blong sef, yumi mas mekem wan samting kwiktaem. Fasin blong slou bambae i givim ded. Haf we i kam biaen i save soemaot saen ya mo olsem wanem yumi save waes blong obei.

[Foto Credit Line Long Pej 2]

Cover photo by National Park Service

[Credit Line Blong Pija Long Pej 3]

Soprintendenza Archeologica di Pompei