Kasem Pei Blong “Laef Long Yufala Blong Flasem Yufala, Olsem We Oli Putum Hat”
LONG enjel ya blong kongregesen long Smana, aposol Jon i mas raetem tok ya long olgeta se: “Yu i mas stanap strong gogo yu ded, nao bambae mi givim laef long yu blong flasem yu, olsem we oli putum hat long man we i win long resis blong flasem hem.” (Revelesen 2:8, 10, NW) Yes, mifala i glad mo sore tu blong talemaot se Frederick William Franz, presiden blong Watch Tower Bible mo Tract Society blong Pennsylvania, Watchtower Bible mo Tract Society blong New York, Inc., mo tu hem i presiden blong sam narafala grup blong tiokratik, hem i finisim laef blong hem long wol ya long Desemba 22, 1992 long moning.
Hem i wan mesej blong sore from we hem i talemaot en blong wok blong wan gudfala brata mo nambawan strong man blong wok blong Jeova, long wol. Be tu hem i wan mesej blong glad from we ol tok blong Revelesen 14:13 i stret long gudfala brata blong yumi, Franz, hem i se: “I stat naoia, ol man we taem oli ded oli man blong Masta blong yu, bambae oli save harem gud.” Brata Franz i wan man we i gat tingting daon, wan man blong wok strong mo wan man we i kasem plante gudfala frut long minista wok blong hem. Jeova i yusum hem bigwan olsem wan memba blong “slef ya we i stret mo waes” blong givimaot kakae long saed blong speret long ol “man blong hem” mo ol fren blong olgeta.—Matyu 24:45-47, NW.
Brata Franz i bon long Septemba 12, 1893, long Kovington, Kentaki. Hem i kasem trutok long bigfala brata blong hem. Long taem ya hem i stap go long Yuniveseti blong Sinsinati, hem i stap lan blong kam wan pasta blong Presbyterian. Be hem i no kam olsem, hem i aot long Presbyterian Jyos mo i joen wetem ol Baebol Studen, hemia nem blong ol Wetnes blong Jeova long taem ya. Hem i baptaes long Novemba 30, 1913, mo long nekis yia blong hem, hem i livim yunivesiti mo hem i mekem wok blong paenia. Long Jun 1, 1920, hem i kam wan memba blong Betel famle long Bruklin. I no longtaem, hem i lukaot long ol wok blong ol paenia, mo long 1926 hem i muf i go wok long raeting dipatmen, long ples ya hem i givhan bigwan. Long 1945 hem i kam namba tu presiden blong Watch Tower Society mo ol narafala haf blong hem. Nao taem presiden blong taem ya, Nathan H. Knorr i ded long 1977, Franz i kam nyufala presiden blong Watch Tower Society, gogo kasem we hem i ded. Long laef blong hem, Brata Franz i luk namba blong ol Wetnes blong Jeova i gru stat long sam taosen man nomo i kam kasem fo mo haf milyan man. Hem i haremgud long plante gudfala wok we hem i mekem, hem i stap givim tok long ol bigfala asembli mo visitim ol branj mo ol haos misinari long plante ples long wol. Store long laef blong hem i stap long Wajtaoa blong Mei 1, 1987 (Engglis mo Franis).
Long Mande naet, Desemba 28, 1992, oli mekem miting long Haos Kingdom blong Bruklin Betel, blong makem ded blong hem. Brata Albert D. Schroeder long Hed Kampani i givim wan gudfala tok blong leftemap tingting long saed blong speret. Ol Betel famle long Watchtower Farms, Patterson, Mountain Farm, mo Kingdom Farm, mo tu Betel famle long branj long Kanada, oli lesin long tok we i pas long telefon i kam. Evriwan, antap moa olgeta we oli wok kolosap long Brata Franz, bambae oli rili mestem hem. Hem i kaen, i leftemap tingting, mo gat longfala tingting long evriwan we hem i stap wok mo mekem trep wetem olgeta. Tru ya, ol narafala man blong bilif oli tingbaot hem olsem tok ya long Hibru 13:7: “Yufala i no fogetem ol man ya we bifo oli stap lidim yufala, we oli talemaot tok blong God long yufala. Yufala i mas tingbaot fasin blong olgeta, we laef blong olgeta i olsem wanem, mo olgeta oli ded olsem wanem. Nao yufala i mas biaen long olgeta, long fasin blong bilif blong olgeta.”
Long Desemba 30, 1992, oli jusum Brata Milton G. Henschel blong kam namba faef presiden blong Society, blong tekem ples blong Brata Franz.
[Tok Blong Pija Long Pej 31]
Frederick W. Franz, long 1913
Long faktri blong Sosaeti, Murtel Avenu, long 1920
Wetem Nathan H. Knorr long Yanki Stadium, long 1953