?Bambae Yu Givim Hamas From Samting Ya?

?YU YU tingbaot wan samting we i sas tumas we yu yu glad blong salemaot olgeta samting we yu gat blong kasem samting ya? Jisas i mekem, mo hem i tokbaot samting ya long ol man blong hem.

Hem i talem se: “Mo bakegen, fasin blong man we God i king blong hem i olsemia. I gat wan bisnesman we hem i stap lukaot ol gudfala perel. Taem hem i faenem wan perel we i nambawan, hem i go salemaot olgeta samting we hem i gat, i go pem perel ya i blong hem.”​—Matyu 13:​45, 46.

Bisnesman ya i glad blong salemaot olgeta samting blong hem blong pem “perel ya,” Kingdom blong God. ?From wanem? From we i no gat wan samting nating long wol ya we yumi save skelem wetem Kingdom ya. Bambae Kingdom blong God i finisim olgeta trabol we ol man oli no save finisim, olsem ol faet, hanggri, fasin blong brekem loa, mo olgeta trabol. (Ol Sam 72:​4-8, 13, 14) Mo tu aninit long Kingdom rul ya, sin, ol sik, mo ded bambae oli no moa stap. (Revelesen 21:​4, 5) Yumi no sapraes long namba tu samting we Jisas i askem long prea blong Masta se (“Papa blong mifala”), “!Letem kingdom blong yu i kam!”​—Matyu 6:​9, 10.

?Bambae yu givim wanem blong joen long ol blesing blong Kingdom ya? Mo tu, ol blesing ya oli fri nomo. Be blong haremgud long olgeta, yu mas save se wanem ya Kingdom, yu mas bilif se hem i rili stap, mo putum hem i stap fasples long laef blong yu. ?Yu save mekem olsem? I gat advaes blong Baebol we oli save givhan long yu. From wanem yu no wantem askem ol Wetnes blong Jeova blong givhan long yu blong save long Kingdom blong God mo blong faenem olsem wanem hem i save givhan long yu naoia tu.