!Lukaot Long Flas Tingting!

Wan waes proveb long Baebol i talem se: “Man we i mekem get blong hem i antap tumas bambae hem i foldaon.” (Proveb 17:19) ?Wanem i rong long wan get we i antap tumas? ?Mo wanem bigfala poen long proveb ya?

BIFO i gat ol man mo ol grup blong ol rabis man we oli stap ron long hos. I isi blong ol man blong stil oli kam stil long ol haos we oli stap long open ples afsaed long taon. Blong blokem ol man blong stil blong oli no stilim olting blong olgeta, sam man oli bildim wan stonwol we i gat wan get we i defren. Stonwol i hae, be get blong hem i daon. Yes, sam get oli olsem wan mita hae​—i daon tumas long wan hos wetem man we i ron long hem blong tufala i pastru long get ya. Olgeta we oli no mekem get we i go insaed long eria blong olgeta i daon, bambae ol man we oli stap ron long hos oli save kam stilim ol samting we oli gat.

Long ol taon, get we i open i go insaed long eria blong taon oli daon mo oli no luk naes, blong no soem ol rij samting we maet oli stap biaen long stonwol ya. Be, long Pesia, wan get we i hae hem i wan saen blong king, sam man we oli stap aninit long king oli traem blong mekem get blong olgeta olsem. Man we i mekem get blong haos blong hem i hae, hem i stap mekem se ol man blong stil oli kam from we hem i flas long ol rij samting blong hem.

Olsemia nao Proveb 17:19 i soem se olgeta we oli mekem get blong olgeta i hae oli save kasem trabol, from we oli stap soem se oli rij be oli no rili rij. Proveb ya i stret tu long maot olsem wan get we i antap tumas from hem i tokflas mo yusum ol flas toktok. Tok olsem i mekem rao i kamaot mo i save lidim flas man ya i go long trabol. !I waes blong no gat flas tingting!

[Foto Credit Line Blong Pija Long Pej 30]

Picturesque Palestine, Sinai and Egypt, Volume 1, by Colonel Wilson (1881)