Wan Kwestin

?From we ol Kristin oli no stap plelake from mane, oli save akseptem ol tikit no givim nem blong olgeta blong oli save winim sam praes?

Hemia wan kwestin we plante taem i stap kamaot, taswe i gat ansa blong hem finis long ol magasin blong yumi. Long sam lanwis, mifala i gat ol indeks blong ol buk blong yumi, olsem Watch Tower Publications Index 1930-1985 (mo i gat wan we i sem mak, hem i kavremap yia 1986-1990). Sipos wan Kristin i gat ol indeks olsem long lanwis blong hem, samting ya i save givhan bigwan long hem blong faenem ol gudfala ansa kwiktaem.

Kwestin ya antap hem i wan eksampel. Lukluk insaed long Index blong 1930-1985 aninit long haf ya “Questions From Readers” (Wan Kwestin), yu save faenem stampa tok ya “‘drawings,’ may Christian accept ticket for?” Nao yu save lukluk bakegen “Questions From Readers” long Wajtaoa blong Febuwari 15, 1973, pej 127 (Engglis).a Plante Wetnes oli gat baond volyum (no ol magasin) blong Wajtaoa 1973, no yu save faenem long laebri blong plante Haos Kingdom.

Ansa we i stap long Wajtaoa we oli wokem long 1973 i soem se i stret nomo we ol Kristin oli no tekem ol tikit we i joen long fasin blong plelake (olsem pem tikit blong winim sam praes) no i yusum mane blong traem lake blong hem blong winim sam praes. Blong talem stret, yumi no joen long plelake, from hem i soem fasin blong wantem evri samting.​—1 Korin 5:11; 6:10; Efesas 4:19; 5:​3, 5.

Be maet wan stoa no wan bisnes i yusum ol tikit ya olsem wan rod blong mekem pablisiti. Wanem man i mas mekem, hem i givim nem blong hem no i sanem long wan pepa no wan tikit, be hem i no pem wan samting. Tikit ya i haf blong pablisiti; oli mekem olsem wan rod blong jusum eni man nomo we bambae i winim wan praes no sam praes. Sam Kristin maet oli harem se oli save akseptem praes ya we wan stoa no bisnes i givim we hem i no joen long fasin blong plelake, hem i jes olsem we oli save akseptem sam samting no sam presen we wan bisnes no wan stoa i stap yusum long pablisiti blong hem.

Be, sam Kristin oli no wantem joen long eni samting we i olsemia, oli no wantem mekem ol narafala i foldaon no spolem tingting blong olgeta mo tu oli wantem stap longwe long sam samting blong pulum man i trastem Woman god ya blong Laki. Olsem Aesea 65:11 i soem se, ol man blong God oli no joen long “god blong Laki” no “god ya we ol man oli stap ting se hem i save makemaot taem blong laef mo ded.” Maet oli harem se oli no wantem kam haf blong eni kaen pablisiti we ol man we oli winim praes maet oli mas joen long hem. Olgeta we oli harem olsem oli no mas toktok smol from wan Kristin no ol Kristin we voes blong hat blong olgeta i letem olgeta blong oli akseptem ol tikit we ol stoa no ol bisnes oli stap givim.​—Lukluk Rom 14:​1-4.

[Futnot]