?Hem i Solemdaon Jona?
BAEBOL i talem long yumi se Jona, wan profet blong Jeova we i laef long ol yia 800 B.K.T., hem i ronwe long wan wok. Hem i go long wan sip. Long trip ya long Mediterenian Si we strongfala win i mekem solwora i raf tumas, ol boskru oli sakem Jona i go long solwora. “Nao Jeova i makemaot wan bigfala fis blong i kam solemdaon Jona. Ale, Jona i stap insaed long bel blong bigfala fis ya long tri dei mo long tri naet.”—Jona 1:3-17.
Sam man oli talem se, ‘!Samting ya i no save hapen! I no gat wan fis long solwora we i save solemdaon wan man.’ Be wan spem welfis no wan waet sak i save mekem olsem. I no longtaem i pas, National Geographic (Desemba 1992) i tokbaot wan narafala fis we i save mekem—welsak. Sak ya we i bigwan moa bitim ol narafala sak we oli save long olgeta, hem i save gru we longfala i kasem 20 mita mo hevi blong hem i save kasem 70 tan.
“Basket blong kakae insaed long welsak i defren, hem i laenap long ol store blong Jona. I isi blong tingbaot se wan welsak i mestem i pulum yu i go long maot blong hem, we i bigwan . . . Hol blong maot blong wan smol welsak i save holem tu man wantaem, we oli olsem Jona.”
Welsak i stap kakae ol smosmol fis we oli stap swim olbaot long solwora, we “oli pas long trot blong hem i go long bigfala bel blong hem kolosap long hat, we i olsem lastik.” ?Be, olsem wanem man i save kamaot? National Geographic i talem se:
“Ol sak oli gat wan isi rod blong sakemaot ol bigfala samting we oli strong tumas blong bel blong olgeta i brekemdaon . . . Wan sak i save karemaot sloslou samting we i stap long bel blong hem, taem hem i tanem insaed bel blong hem i go afsaed mo pusum i kamaot tru long maot blong hem. . . . Olsemia nao, yu save glis i kamaot long sofsof bel ya, bambae bodi blong yu i smel lelebet, be ating bambae yu waes moa from samting we i bin hapen long yu.”
Tede oli no faenem welsak long Mediterenian Si, be oli faenem olgeta longwe long saed i go long not go kasem Nyu Yok Siti. ?Ol welsak ya oli stap long Mediterenian long taem blong Jona? ?Hu i save? Baebol i no talem klia se wanem kaen fis blong solwora nao Jeova i yusum, be Jisas i talemaot se store blong Jona i tru.—Matyu 12:39, 40.
[Foto Credit Line blong pija long pej 32]
Norbert Wu/Peter Arnold Inc.